ملتان میں لٹیروں نے دوران ڈکیتی مزاحمت کرنے پر دکاندار کو ابدی نیند سلا دیا۔ مشتعل ورثا سڑکوں پر آگئے اور ٹائر جلا کر احتجاج کیا۔ پولیس نے ایک ڈاکو کو گرفتار کر لیا ہے۔
ملتان: (دنیا نیوز) معصوم شاہ روڈ پر دو نقاب پوش افراد دکان میں گھسے اور اسلحے کے زور پر لوٹ مار شروع کر دی۔ بائیس سالہ نوجوان نعمان نے مداخلت کی تو ڈاکوؤں نے گولیاں چلا دیں۔ جس سے نعمان موقع پر ہی جاں بحق ہو گیا جبکہ چوبیس سالہ شہزاد کو زخمی حالت میں اسپتال منتقل کر دیا گیا۔ واردات کے دوران ارد گرد کی دکانوں پر موجود افراد بھی خوف وہراس کا شکار رہے۔ واقعہ کے بعد اہل علاقہ سراپا احتجاج بن گئے اور ٹائر جلا کر مظاہرہ کیا۔ دوسری جانب پولیس نے چھاپوں کے دوران ڈکیتی کے ایک ملزم کو گرفتار کر لیا جبکہ دوسرے ساتھی کی گرفتاری کیلئے بھی کارروائیاں جاری ہیں۔
