ایڈیشنل سیکرٹری ہائیر ایجوکیشن سمیت 9 افسران ذمہ دار قرار، ایک ہزار سات سو اکہتر طلبہ دو، دو لیپ ٹاپ لے اُڑے، سپیشل آڈٹ میں انکشاف
لاہور: (دنیا نیوز) پنجاب میں وزیر اعلیٰ لیپ ٹاپ سکیم میں مبینہ گھپلے کی سپیشل آڈٹ رپورٹ میں انکشاف ہوا ہے کہ پنجاب میں 1771 طلبہ 2، 2 لیپ ٹاپ لینے میں کامیاب ہو گئے جس کی وجہ سے سرکاری خزانے کو 6 کروڑ 95 لاکھ 97 ہزار 136 روپے کا نقصان ہوا۔ رپورٹ کے مطابق 2481 طلبہ نے جعلی شناختی کارڈ جمع کرا کے لیپ ٹاپ وصول کیے۔
سپیشل آڈٹ رپورٹ کے اجراء کے بعد وزیر اعلیٰ پنجاب شہباز شریف کی جانب سے ایکشن لیا گیا اور ایڈیشنل چیف سیکرٹری پنجاب شمائل احمد خواجہ کی سربراہی میں تحقیقاتی کمیٹی تشکیل دی گئی جس نے مکمل تحقیقات کرکے رپورٹ وزیراعلی پنجاب کو دے دی ہے۔ ذرائع کے مطابق رپورٹ میں محکمہ ہائر ایجوکیشن کے ایڈیشنل سیکرٹری اور ڈپٹی سیکرٹریز سمیت 9 افسران کو ذمہ دار ٹھہرایا گیا ہے جبکہ لیپ ٹاپ تقسیم کرنے میں متعلقہ یونیورسٹی کے سربراہان کو بری الزمہ قرار دیا گیا ہے۔ رپورٹ میں بتایا گیا ہے کہ لیپ ٹاپ تقسیم کے وقت افسران نے مکمل جائزہ نہیں لیا تھا۔
