اسلام آباد: (دنیا نیوز) جمعیت علمائے اسلام (ف) کے سربراہ مولانا فضل الرحمان کے آزادی مارچ اور دھرنے کے خلاف درخواست سماعت کے لیے مقرر کر دی گئی ہے۔ اسلام آباد ہائیکورٹ کے چیف جسٹس بدھ کو مقدمہ سنیں گے۔
تفصیلات کے مطابق اسلام آباد ہائیکورٹ نے مولانا فضل الرحمن کے حکومت مخالف آزادی مارچ اور دھرنا کے خلاف درخواست سماعت کے لیے مقرر کر دی ہے۔
چیف جسٹس اطہر من اللہ بروز بدھ مورخہ 09 اکتوبر کو درخواست پر سماعت کریں گے۔ اسلام آباد ہائیکورٹ کے رجسٹرار آفس نے کاز لسٹ جاری کر دی ہے۔
درخواست میں مولانا فضل الرحمن کو آزادی مارچ اور دھرنا دینے سے روکنے کی استدعا کرتے ہوئے کہا گیا ہے کہ سپریم کورٹ اور اسلام آباد ہائیکورٹ نے دھرنے مختص جگہ کرنے کا حکم دے رکھا ہے۔
شہری کی جانب سے دائر درخواست میں سیکریٹری داخلہ، سیکرٹری تعلیم، مولانا فضل الرحمن، ڈپٹی کمشنر اسلام آباد اور چیئرمین پیمرا کو فریق بنایا گیا ہے۔
دوسری جانب وفاقی وزیر امور کشمیر علی امین گنڈا پور نے آئین میں تبدیلی اور اسرائیل کو تسلیم کرنے کے الزامات پر جے یو آئی ف کے سربراہ مولانا فضل الرحمن کو قانونی نوٹس بھجوا دیا ہے۔
