برطانوی شاہی جوڑے کا گرلز ہائی سکول اسلام آباد کا دورہ، مختلف شعبوں کا جائزہ

اسلام آباد: (دنیا نیوز) شاہی جوڑے شہزادہ ولیم اور شہزادی کیٹ مڈلٹن نے اسلام آباد میں گورنمنٹ گرلز ہائی سکول یونیورسٹی کالونی کا دورہ کیا، شاہی جوڑا سکول میں بچیوں میں گھل مل گیا۔

 شہزادی کیٹ مڈلٹن نیلے رنگ کے پاکستانی لباس میں ملبوس مشرق و مغرب کا حسین امتزاج دکھائی دے رہی تھیں۔ شہزادہ ولیم نے سیاہ پتلون اور ہلکے آسمانی رنگ کی شرٹ زیب تن کر رکھی تھی۔

 شاہی جوڑا شہر بے مثال کے دلفریب موسم اور چمکیلی دھوپ سے لطف اندوز ہوتا ہوا گورنمنٹ گرلز ہائی سکول یونیورسٹی کالونی پہنچا جہاں سکول انتظامیہ نے انہیں خوش آمدید کہا۔

 شہزادہ ولیم اور شہزادی کیٹ مڈلٹن سکول کے بچوں میں گھل مل گئے، شاہی جوڑے نے سکول میں ریاضی کی کلاس کا معائنہ بھی کیا، شہزادہ ولیم اور اہلیہ کیٹ مڈلٹن نے سکول کے مختلف حصے دیکھے، سکول انتظامیہ نے شاہی جوڑے کو سکول سے متعلق بڑیفنگ بھی دی۔

 شاہی جوڑے کو پاکستان میں نظام تعلیم سے متعلق بھی بتایا، واپسی پر سکول کے بچوں نے شاہی جوڑے کو رخصت کیا۔ اس موقع پر شہزادہ ولیم اور شہزادی کیٹ نے اپنے استقبال پر بچوں کے ساتھ مسکراہٹوں کے ساتھ ہلکی پھلکی گفتگو بھی کی۔

 2006 کے بعد برطانوی شاہی خاندان کے کسی بھی فرد کا یہ پہلا سرکاری دورہ ہے۔ برطانوی ہائی کمیشن کے ذرائع کے مطابق برطانوی شاہی جوڑا بھاری بھرکم سکیورٹی ٹیم کے ہمراہ پاکستان پہنچا، برطانوی شاہی جوڑے کیلئے 40 سے زائد ڈاکٹر، پیرا میڈکس اور طبی عملہ بھی سکیورٹی ٹیم کا حصہ ہے۔ شاہی جوڑے کے ہمراہ ان کے محافظ اور 40 سے زائد صحافی بھی پاکستان آئے ہیں۔

 برطانوی شاہی جوڑا کل (16 اکتوبر) چترال جائے گا جہاں وہ مقامی افراد سے بھی ملے گا اور شمالی علاقہ جات کے پرفضا مقامات کا بھی دورہ کرے گا۔ برطانوی شاہی مہمان صوبہ خیبر پختونخوامیں درہ خیبر، قلعے کا دورہ بھی کریں گے۔

برطانوی شاہی جوڑے کی پاکستان آمد، مہمانوں کا پرتپاک استقبال

 شاہی جوڑا 17 اکتوبر کو لاہور میں ایس او ایس ویلیج، ایچی سن کالج جائے گا۔ شہزادہ اور شہزادی شوکت خانم ہسپتال بھی جائینگے۔ سکیورٹی وجوہات کی بنا پر تاحال بادشاہی مسجد، مینار پاکستان کا دورہ حتمی نہیں۔ شہزادہ ولیم اور اہلیہ 18 اکتوبر کو فیصل مسجد جائیں گے، اسی روز دوپہر ڈیڑھ بجے نور خان ایئر بیس سے وطن واپس روانہ ہو جائیں گے۔

  یاد رہے اس سے قبل پرنس ولیم کی والدہ شہزادی ڈیانا نے 1996 میں پاکستان کا ایک دورہ کیا تھا جبکہ 2006 میں پرنس ولیم کے والد پرنس چارلس اور ان کی اہلیہ کامیلا نے پاکستان کا دورہ کیا۔ اس کے علاوہ برطانوی ملکہ الزبتھ بھی 1961 اور 1997 میں پاکستان کے سرکاری دورے کر چکی ہیں۔

ادھر پاکستانی مصورہ رابعہ ذاکر نے برطانوی پرنس ولیم اور کیٹ مڈلٹن کی شادی کا پورٹریٹ تیار کرلیا، جو شاہی مہمانوں کو دیں گی۔ مصورہ رابعہ ذاکر نے دو ہفتوں کی مسلسل محنت سے شہزادے اور شہزادی کی تصویر کینونس پر اتار کر حقیقت کا رنگ بھر دیا، پورٹریٹ میں رائل چہروں کو بنانے کیلئے مصورہ کو یورپی آرٹسٹ سے مشاورت کرنا پڑی۔