لاہور: (دنیا نیوز) ٹماٹر ایک مشہور پھل ہے اور سبزی کی طرح استعمال ہوتا ہے۔ یہ دنیا کے تقریباً ہر ملک میں پایا جاتا ہے۔ اسے پکا کر اور بغیر پکائے بکثرت کھایا جاتا ہے۔ یہ جتنا زیادہ سرخ ہو گا اتنا ہی پختہ ہو گا۔
ٹماٹر میں وٹامن اے، بی اور سی کثیر مقدار میں موجود ہوتے ہیں۔ اسے دنیا بھر میں سلاد کے طور پر بھی کھایا جاتا ہے۔ ہمارے ہاں ٹماٹر کی دو قسمیں ہیں، میدانی اور پہاڑی ٹماٹر۔ میدانی علاقوں کا ٹماٹر گول اور پہاڑی علاقوں کا ٹماٹر لمبوترا ہوتا ہے۔ سبزیاں یا گوشت وغیرہ پکاتے وقت اسے شامل کر کے سالن تیار کیا جاتا ہے، جس سے کھانے کا ذائقہ مزے دار ہوتا ہے۔ اس کے اجزاء میں فولاد شامل ہے۔ اس کا مزاج سرد تر ہے۔ یہ وہ سبزی ہے جسے عام طور پر تنہا پکا کر نہیں کھایا جاتا۔ اس کی میٹھی چٹنی بھی تیار کی جاتی ہے جسے ٹماٹو ساس کہتے ہیں جو گھر میں کھانے کے علاوہ ہوٹلوں اور ضیافتوں میں استعمال ہوتی ہے۔
ٹماٹر کے حسب ذیل فوائد ہیں۔
یہ بھوک لگاتا ہے اور کھانے کو ہضم کرتا ہے۔
قبض کشا ہے۔
اگر بچوں کے ہاتھ پاؤں ٹیڑھے ہو جائیں تو ٹماٹر کا رس متواتر پلاتے رہنے سے جلد آرام آ جاتا ہے۔
خون کی کمی، یرقان، ورم گردہ، ذیابیطس اور موٹاپے میں صبح نہار منہ ایک بڑا سرخ ٹماٹر استعمال کرنے سے بہت فائدہ ہوتا ہے۔
ٹماٹر خون کو صاف اور جسم کی خشکی کو دور کرتا ہے۔
وہم اور وحشت کو ختم کرتا ہے۔
کچا ٹماٹر کھانے کی صورت میں کچھ دیر پانی ہرگز نہیں پینا چاہیے تا کہ اس میں موجود تیزابی مادے معدے میں بغیر پانی پیے اپنا کام بخوبی سر انجام دے سکیں۔
طبیعت کو فرحت دیتا ہے۔
گرمیوں میں اس کا استعمال گرمی اور حرارت ختم کرتا ہے، اس لیے اس کا گرمیوں میں زیادہ استعمال ہوتا ہے۔
گرم سبزیوں کی تاثیر بدلنے کیلئے اس میں ٹماٹر کا اضافہ کیا جاتا ہے۔
مریض اور کمزور افراد کیلئے ٹماٹر کا استعمال بے حد مفید ہوتا ہے۔
دانتوں کو مضبوط بنانے اور بیماریوں سے محفوظ رکھنے کیلئے ٹماٹر کا استعمال بہت مفید ہے۔
ٹماٹر کے جوس میں وہ تمام اجزاء پائے جاتے ہیں جو بچوں کی پرورش کیلئے ضروری ہوتے ہیں۔ اس لیے بچوں کو روزانہ صبح ایک ٹماٹر دھو کر کھلانا بہت مفید ہوتا ہے۔
ان ماؤں کیلئے ٹماٹر کھانا بے حد نفع بخش ہوتا ہے جن کے بچے شیر خوار ہوتے ہیں۔
حاملہ خواتین کیلئے صبح صبح ایک ٹماٹر کا جوس بہت مفید ہے۔
ہمیشہ صحت مند رہنے کیلئے ضروری ہے کہ دوپہر کے کھانے کے ساتھ مولی، چقندر، سلاد اور ٹماٹر کا استعمال ضرور کریں۔
مذکورہ بالا فوائد کے علاوہ ٹماٹر کے چند نقصانات بھی ہیں۔
ٹماٹر بادی اور بلغم پیدا کرتا ہے۔
تپ دق کے مریضوں کیلئے ٹماٹر مفید نہیں ہے۔
سینے اور گلے کے امراض والے مریض کیلئے ٹماٹر فائدہ مند نہیں ہے۔
گردہ کی پتھری والے مریض بھی ٹماٹر استعمال نہ کریں۔
ٹماٹر زکام پیدا کرتا ہے اور پیٹ میں ٹماٹر سے نفخ پیدا ہوتی ہے۔
