لاہور: (ویب ڈیسک) دنیا بھر میں متعدد کمپنیاں عوام تک اپنے نت نئے موبائل فون پہنچانے کے لیے نئے سے نئے موبائل فون لانچ کرتے رہتی ہیں، اس دوران ہر نت نئے موبائل کی لانچنگ کی تقریب کے دوران کم سے کم ریٹ بھی عوام کے لیے رکھے جاتے ہیں تاکہ زیادہ سے زیادہ صارف کمپنی کے موبائل خریدیں۔ اب ایچ ایم ڈی گلوبل نے اینڈرائیڈ گو ایڈیشن کا نیا فون نوکیا سی 1 پاکستان میں متعارف کرادیا ہے جو کمپنی کا اب تک کا سب سے سستا فون بھی سمجھا جا رہا ہے۔
45 انچ کے اس فون میں اینڈرائیڈ 9 آپریٹنگ سسٹم کا گو ایڈیشن دیا گیا ہے۔ اینڈرائیڈ گو ایڈیشن میں گوگل ایپس انٹرنیٹ ڈیٹا کا استعمال کرتی ہیں اور سست انٹرنیٹ پر بھی تیز کام کرتی ہیں۔
اس فون میں ایک جی بی ریم اور 16 جی بی اسٹوریج دی گئی ہے جس کومائیکرو ایس ڈی کارڈ سے 64 جی بی تک بڑھایا جاسکتا ہے۔ کمپنی کے بقول ایسا اسمارٹ فون ہے جس کا استعمال آسان ہے اور اس کی بیٹری ایک چارج پر آسانی سے پورا دن کام کرسکتی ہے۔
فرنٹ پر 5 میگا پکسل کیمرا اور ایل ای ڈی فلیش موجود ہے جو کم روشنی میں بھی کافی بہتر تصاویر لینے میں مدد فراہم کرتی ہے اور اس طرح کمپنی نے مہنگے پراسیسر اور مشین لرننگ کا خرچہ بھی بچالیا۔ اس کے بیک پر ایک ہی کیمرا ہے جو کہ 5 میگا پکسل کا ہے جس کے ساتھ بھی ایل ای ڈی فلیش موجود ہے۔
فون میں دیئے گئے پراسیسر کی کمپنی کے بارے میں نوکیا نے کچھ نہیں بتایا مگر یہ کواڈ کور 1.3 ہرٹز پراسیسر ہے (ممکنہ طور پر میڈیا ٹیک کا ہوگا)۔ اس ڈوئل سم فون میں ایل ٹی ای کنکٹویٹی کا آپشن نہیں بلکہ تھری جی تک محدود ہے جبکہ وائی فائی 4 کو سپورٹ کرتا ہے۔
2500 ایم اے ایچ بیٹری والے اس فون کی قیمت پاکستان میں 8 ہزار 500 روپے رکھی گئی ہے جو کہ یکم جنوری سے ملک میں صارفین کو 2 رنگوں میں دستیاب ہوگا۔
