اسلام آباد:(روزنامہ دنیا)سی پیک کے تحت توانائی کے شعبے میں بڑی پیش رفت جاری ہے ، توانائی کے منظور شدہ 22 منصوبوں میں سے 9 مکمل ہوگئے۔
میڈیا رپورٹ کے مطابق مکمل ہونے والے 9 منصوبوں سے 5 ہزار 320 میگاواٹ بجلی پیدا کی جارہی ہے ، ان منصوبوں میں کوئلے کے 1320 میگاواٹ کے ساہیوال، پورٹ قاسم اور چائنا حب منصوبے شامل ہیں۔ 660 میگاواٹ کا اینگرو تھر اور 400 میگاواٹ قائداعظم سولر پارک کے منصوبے بھی مکمل ہوچکے ہیں۔ مزید 4 ہزار 470 میگاواٹ کے 8 منصوبے تکمیل کے آخری مراحل میں داخل ہوچکے ہیں، کوہالہ، تھر اور آزاد پتن سمیت 5 منصوبے بھی پائپ لائن میں ہیں۔ ان منصوبوں کی تکمیل سے ملکی ضروریات پوری ہونے سمیت بجلی برآمد بھی کی جاسکے گی۔
سرمایہ کاری بورڈ حکام کے مطابق چین پاکستان اقتصادی راہداری کا کوئی بھی منصوبہ تاخیر کا شکار نہیں ہے ، پاکستان اور چین نے موسمیاتی تبدیلی، آبی انتظام، جنگلات اور آلودگی سے پاک ماحول کی بحالی کے شعبوں میں تعاون کو فروغ دینے پر بھی خصوصی توجہ دی ہے ۔
