پشاور: (دنیا نیوز) مشیر خزانہ خیبرپختونخوا مزمل اسلم نے کہا ہے کہ شہباز حکومت 2 سال میں تیسری بار آئی ایم ایف پروگرام میں داخل ہورہی ہے۔
آئی ایم ایف پروگرام پر ردعمل دیتے ہوئے مشیر خزانہ خیبرپختونخوا مزمل اسلم کا کہنا تھا کہ پاکستان 1959 سے لیکر مسلسل آج تک آئی ایم ایف پروگرام میں ہے، پاکستان نے اب تک 24 آئی ایم ایف کے پروگرامز حاصل کئے، 24 میں سے 7 پروگرامز فوجی حکومتوں میں لئے گئے۔
انہوں نے کہا کہ24 میں سے 17 پروگرامز سیاسی حکومتوں نے لئے ہیں، بانی پی ٹی آئی کی حکومت نے صرف ایک پروگرام لیا اور اس میں سے بھی صرف آدھی رقم بطور قرض لی تھی، پاکستان کے سب سے زیادہ قرض پروگرامز پی ڈی ایم حکومت نے 16ماہ میں حاصل کئے۔
مزمل اسلم نے کہا کہ شہباز شریف حکومت دو سال میں تین دفعہ آئی ایم ایف پروگرام میں داخل ہوئی ہے، شہباز شریف کا دعویٰ کہ یہ آخری پروگرام ہوگا کیا درست ہو گا؟ آئی ایم ایف کے نئے تخمینہ جات انتہائی مایوس کن ہیں۔
مشیر خزانہ خیبرپختونخوا نے کہا کہ آئی ایم ایف نے جی ڈی پی 3.5 فیصد سے 3.2 فیصد تک ہونے کی پیش گوئی کی ہے، آئی ایم ایف پیکیج کے ساتھ کرنٹ اکاؤنٹ خسارہ 0.9 فیصد سے 1.2 فیصد ہو جائے گا،فارن ایکسچینج ریزروز 13.3 ارب ڈالر سے 12.8 ارب ڈالر تک کم ہو جائیں گے۔
ان کا مزید کہنا تھا کہ حکومت کا عام جی ڈی پی قرض 69.2 فیصد سے 71.4 فیصد تک بڑھ سکتا ہے، پبلک اور پبلک ضمانت شدہ قرض میں معیشت کے مجموعی سائز کا 73 فیصد سے 75.1 فیصد تک اضافہ ہوا ہے۔
