اسلام آباد: (مدثر علی رانا) رواں مالی سال کے 7 ماہ جولائی سے جنوری کے دوران ترسیلات زر، برآمدات اور درآمدات میں اضافہ ریکارڈ کیا گیا ہے۔
وزارت خزانہ نے ماہانہ معاشی آؤٹ لک رپورٹ جاری کر دی، رپورٹ کے مطابق کرنٹ اکاؤنٹ خسارہ سرپلس اور بیرونی سرمایہ کاری میں اضافہ ریکارڈ ہوا جبکہ سٹیٹ بینک ذخائر میں اضافہ اور روپے کی قدر مستحکم رہی۔
جولائی تا جنوری ترسیلات زر میں 25.2 فیصد ہوا، برآمدات میں 9.7 فیصد اور درآمدات میں 16.8 فیصد کا اضافہ ریکارڈ کیا گیا، کرنٹ اکاؤنٹ خسارہ جولائی تا جنوری 68 کروڑ ڈالر سے زیادہ سرپلس رہا۔
رپورٹ کے مطابق سٹیٹ بینک کے ذخائر 8 ارب ڈالر سے بڑھ کر 11 ارب 20 کروڑ ڈالر سے زائد رہے، ایف بی آر محصولات میں جولائی تا دسمبر 26.2 فیصد کا اضافہ ہوا جبکہ نان ٹیکس آمدنی میں 82 فیصد کا اضافہ ہوا، مالی خسارے میں جولائی تا دسمبر 36.1 فیصد کی کمی ہوئی۔
وزارت خزانہ کی رپورٹ کے مطابق 7 ماہ میں مہنگائی کی شرح 28.7 فیصد سے کم ہو کر 6.5 فیصد پر آگئی، بیرون ملک ملازمت کیلئے 63 ہزار سے زیادہ پاکستانی جنوری 2025 میں گئے۔
