قاہرہ: (ویب ڈیسک) مصر نے مغربی صحرا میں نئے گیس ذخیرے کی دریافت کا اعلان کر دیا۔
عالمی خبرایجنسی کے مطابق مصر کی وزارت پٹرولیم نے مغربی صحرا میں قدرتی گیس کے ایک نئے ذخیرے کی دریافت کا اعلان کیا ہے، ابتدائی ٹیسٹوں کے مطابق اس کنویں سے یومیہ تقریباً 3 کروڑ 60 لاکھ معیاری مکعب فٹ گیس حاصل ہونے کی توقع ہے۔
جمانہ 1 نامی یہ تحقیقی کنواں برقی لاگز میں گیس سے بھرپور زونز کی نشاندہی کے بعد کھودا گیا تھا، کنویں کی صلاحیت کا مکمل جائزہ اور ٹیسٹنگ جاری ہے جبکہ خلدہ پٹرولیم آئندہ دو دن کے اندر اسے پیداوار کے مرحلے میں داخل کرنے پر کام کر رہی ہے۔
وزارتِ پٹرولیم کا کہنا ہے کہ نئی دریافت ملکی پیداوار میں اضافہ کرے گی اور مصر کو خطے میں توانائی کے مرکز کے طور پر مستحکم کرنے کی حکمتِ عملی کو تقویت دے گی۔
یہ بات قابلِ ذکر ہے کہ مصر حالیہ برسوں میں قدرتی گیس کی پیداوار میں کمی کے باعث نئے ذخائر کی تلاش میں دلچسپی بڑھا رہا ہے، اگست میں وزیرِ اعظم مصطفیٰ مدبولی نے بتایا تھا کہ ملک کی موجودہ یومیہ گیس پیداوار 4.1 بلین مکعب فٹ ہے جسے 2027 تک 6.6 بلین مکعب فٹ تک بڑھانے کا ہدف مقرر کیا گیا ہے۔
