اسلام آباد: (دنیا نیوز) وزیر اعظم کے معاون خصوصی ہارون اختر خان نے کہا ہے کہ پاکستان کو بیرونی سرمایہ کاری سے پہلے خود اپنے ملک میں سرمایہ کاری کرنا ہوگی۔
وزیر اعظم کے معاون خصوصی ہارون اختر خان کی پاکستان بزنس کونسل کے ڈائیلاگ آن اکانومی سیشن میں شرکت کی جہاں انہوں نے پاکستان کے ٹیکس، ایکسپورٹ اور صنعتی ترقی پر بات کی۔
ہارون اختر خان کا کہنا تھا کہ روزگار کے مواقع کیلئے تیز رفتار معاشی ترقی ضروری ہے، صنعتی ترقی کے بغیر کوئی ملک خوشحال نہیں ہوسکتا، برآمدات کی رفتار درآمدات سے زیادہ ہونی چاہیے ورنہ تجارتی خسارہ بڑھتا ہے۔
انہوں نے کہا کہ برآمدات بڑھانے کیلئے مینوفیکچرنگ کو فروغ دینا ہوگا، اس وقت درآمدات برآمدات سے زیادہ ہیں، جس سے معیشت دباؤ کا شکار ہے، سٹیل سمیت مختلف چیزیں مقامی طور پر تیار کرنا ایکسپورٹز فروغ کیلئے ناگزیر ہے۔
معاون خصوصی کا مزید کہنا تھا کہ ایف بی آر نے اصلاحات میں بہترین کارکردگی دکھائی ہے، پاکستان خود اپنی قوت سے ترقی کر سکتا ہے، آئی ایم ایف کے سامنے صنعتی پالیسی میں ٹیکس پیکج پیش کیا جائے گا۔
