لندن: (ویب ڈیسک) انگلینڈ کے مایہ ناز بیٹر جو روٹ نے آئی سی سی ورلڈ ٹیسٹ چیمپئن شپ میں بھارت کے خلاف میچ کے دوران اہم سنگ میل عبور کر لیا۔
34 سالہ جو روٹ نے آئی سی سی ورلڈ ٹیسٹ چیمپئن شپ میں 6000 رنز بنانے والے پہلے کھلاڑی ہونے کا اعزاز حاصل کیا ہے، جو روٹ نے یہ سنگ میل بھارت کے خلاف جاری پانچ ٹیسٹ میچوں کی سیریز کے آخری میچ میں عبور کیا۔
انگلش بیٹر نے ورلڈ ٹیسٹ چیمپئن شپ کے اپنے 69 ویں میچ میں یہ سنگ میل عبور کیا، وہ اب تک ہونے والی چاروں چیمپئن شپ میں حصہ لے چکے ہیں۔
اس کے علاوہ جوروٹ نے ایک اور سنگ میل عبور کیا، انہوں نے ٹیسٹ کرکٹ میں اپنی 39 ویں سنچری مکمل کی اور ٹیسٹ کرکٹ میں سب سے زیادہ سنچریاں بنانے والوں کی فہرست میں سنگاکارا کو پیچھے چھوڑتے ہوئے چوتھے نمبر پر آگئے ہیں۔
جو روٹ نہ صرف ورلڈ ٹیسٹ چیمپئن شپ میں سب سے زیادہ رنز بنانے والےکھلاڑی ہیں بلکہ وہ ٹیسٹ کرکٹ کی تاریخ میں ٹنڈولکر کے بعد دوسرے سب سے زیادہ رنز بنانے کا ریکارڈ رکھتے ہیں۔
انہوں نے 158 ٹیسٹ میچز میں 57.49 کی اوسط سے 13 ہزار 543 رنز بنائے ہیں جن میں 39 سنچریاں اور 66 نصف سنچریاں شامل ہیں جبکہ ٹنڈولکر نے 200 ٹیسٹ میچز میں 53.78 کی اوسط سے 15 ہزار 921 رنز بنا رکھے ہیں۔
موجودہ کھلاڑیوں میں صرف آسٹریلیا کے سٹیو سمتھ ہیں جنہوں نے ٹیسٹ کرکٹ میں 10 ہزار 477 رنز بنا رکھے ہیں، جو روٹ کے علاوہ کوئی اور کھلاڑی ٹندولکر کے ریکارڈ کے قریب نہیں ہے۔
