ممبئی: (دنیا نیوز) آئی سی سی ویمنز ورلڈ کپ کے دوسرے سیمی فائنل میں بھارت نے آسٹریلیا کو شکست دیکر فائنل کیلئے کوالیفائی کرلیا۔
بھارتی ویمنز کرکٹ ٹیم نے آسٹریلیا کی جانب سے ملنے والا 338 رنز کا ہدف 48.3 اوورز میں 5 وکٹوں کے نقصان پر حاصل کرلیا، جمائمہ روڈریگز نے 127 رنز کی ناقابل شکست اننگز کھلی۔
بھارت کی جانب سے دیگر کھلاڑیوں میں کپتان ہرمن پریت کور 89 رنز کیساتھ نمایاں رہیں، ریچا گھوش نے 26، شفالی ورما نے 10 جبکہ سمرتی مندھانا اور دپتی شرما نے 24، 24 رنز بنائے۔
قبل ازیں ممبئی میں کھیلے جانیوالے میگا ایونٹ کے دوسرے سیمی فائنل میں آسٹریلیا ویمنز کرکٹ ٹیم نے ٹاس جیت کر پہلے بیٹنگ کا فیصلہ کیا ، پہلے بیٹنگ کرتے ہوئے آسٹریلیا کی پوری ٹیم آخری اوور میں 338 رنز بناکر ڈھیر ہوگئی۔
آسٹریلیا کی جانب سے فوبی لیچ فیلڈ نے 119 رنز کی شاندار اننگز کھیلی جبکہ ایلیس پیری 77 اور ایشلی گارڈنر 63 رنز کیساتھ نمایاں رہیں۔
آئی سی سی ویمنز ورلڈ کپ کا فائنل ٹاکر 2 نومبر کو بھارت اور جنوبی افریقا کے درمیان کھیلا جائے گا۔
واضح رہے کہ گزشتہ روز میگا ایونٹ کے پہلے سیمی فائنل میں جنوبی افریقا نے انگلینڈ کو 125 رنز سے شکست دیکر تاریخ میں پہلی مرتبہ فائنل میں رسائی حاصل کی تھی۔
