رائزنگ سٹار ایشیا کپ: پاکستان شاہینز نے بھارت کو 8 وکٹوں سے ہرا دیا

دوحہ: (دنیا نیوز) رائزنگ اسٹار ایشیا کپ کے چھٹے میچ میں پاکستان شاہینز نے بھارت کو 8 وکٹوں سے شکست دیدی۔

پاکستان شاہینز نے بھارت کی جانب سے ملنے والے 137 رنز کا ہدف 13.2 اوورز میں 2 وکٹوں کے نقصان پر باآسانی حاصل کرلیا، پاکستان کی جانب سے معاذ صداقت79رنز بنا کر ٹاپ سکورر رہے، محمد نعیم نے 14اور یاسر خان نے 11رنز بنائے۔

قبل ازیں قطر کے دارالحکومت دوحہ میں کھیلے گئے میچ میں بھارت اے ٹیم پہلے بیٹنگ کرتے ہوئے مقررہ 20 اووز بھی کھیل نہ سکی اور 19ویں کے آخری گیند پر پوری ٹیم 136 رنز بنا کر پویلین واپس لوٹ گئی۔

بھارت کی جانب سے ویبھو سوریا ونشی نے 28 گیندوں پر برق رفتار 45 رنز کی اننگز کھیلی، نامن داہر 35 رنز بنا کر نمایاں رہے جبکہ دیگر بیٹرز خاطر خواہ کارکردگی دکھانے میں ناکام رہے۔

پاکستان کی جانب سے شاہد عزیز نے شاندار باؤلنگ کا مظاہرہ کرتے ہوئے صرف 24 رنز کے عوض 3 کھلاڑیوں کو آؤٹ کیا، معاذ صداقت اور سعد مسعود نے 2،2 وکٹیں اپنے نام کیں، صفیان مقیم، احمد دانیال اور عبید شاہ نے ایک، ایک شکار کیا۔

واضح رہے کہ بھارت کی سینئر مینز ٹیم کی طرح ایمرجنگ پلیئرز نے بھی کھیل میں سیاست کو شامل کیا اور پاک-بھارت میچ میں ٹاس پر بھارتی کپتان نے پاکستانی کپتان سے ہاتھ نہیں ملایا۔