ہر چیلنج کیلئے تیار، سہ فریقی سیریز میں بھی بہترین پرفارم کریں گے: شاہین شاہ آفریدی

راولپنڈی: (دنیا نیوز) قومی ون ڈے ٹیم کے کپتان شاہین شاہ آفریدی نے کہا کہ ہر چیلنج کیلئے تیار ہیں، سہ فریقی سیریز میں بھی بہترین پرفارم کریں گے۔

کپتان شاہین شاہ آفریدی نے بابراعظم اور محمد رضوان کی تعریف کرتے ہوئے کہا ہے کہ ہر چیلنج کے لئے تیار ہیں، تمام کھلاڑیوں پر مکمل اعتماد ہے اور سہ فریقی سیریز میں بھی بہترین کارکردگی دکھائیں گے۔

شاہین شاہ آفریدی نے سری لنکا کے خلاف تیسرے ون ڈے اور سیریز میں 0-3 سے کامیابی کے بعد پریس کانفرنس میں کہا کہ ٹیم کے تمام کھلاڑی محنت کر رہے ہیں اور ہر کھلاڑی پر مکمل اعتماد ہے کیونکہ وہ پاکستان کے لئے کھیلتے ہیں۔

انہوں نے بابراعظم کی کارکردگی کو سراہتے ہوئے کہا کہ بابر ٹیم کی ریڑھ کی ہڈی ہیں اور ہمیشہ ٹیم کے لئے اہم کردار ادا کرتے ہیں، بابراعظم نے پہلی بار سنچری نہیں بنائی لیکن ہم کافی عرصے سے ان کی سنچری کے منتظر تھے اور انہوں نے شاندار کارکردگی کا مظاہرہ کرکے خود کو بہترین انداز میں ثابت کیا ہے۔

قومی ون ڈے ٹیم کے کپتان نے محمد رضوان کی تعریف کرتے ہوئے کہا کہ رضوان نے بہترین انداز میں سینئر کھلاڑی کا کردار ادا کیا۔

شاہین شاہ آفریدی نے وسیم جونیئر کے حوالے سے کہا کہ انہیں کچھ انجریز کا سامنا تھا لیکن وہ ٹیم کے ساتھ رہے، آرام بھی دیا گیا تاہم اب وہ مکمل فٹ ہیں اور ون ڈے میں کامیاب واپسی کر چکے ہیں، پاکستان کے تمام بولرز گیم چینجر ہیں۔