لاہور: (دنیا نیوز) پاکستان کرکٹ بورڈ (پی سی بی) نے قومی کرکٹرز کو مختلف لیگز کے لیے این او سی جاری کردیئے۔
ذرائع کے مطابق قومی کرکٹرز کو ابوظہبی میں ٹی 10 لیگ اور آئی ایل ٹی 20 کے لیے این او سی جاری کیے گئے ہیں۔
ذرائع کا بتانا ہے کہ ابوظہبی کے لیے این او سی 25 نومبر تک اور دبئی کی ٹی 20 لیگ کے لیے 3 کرکٹرز کو 2 دسمبر سے 4 جنوری تک این او سی جاری کیے گئے ہیں۔
دبئی کی ٹی 20 لیگ کے لیے فخر زمان، حسن نواز اور نسیم شاہ کو جبکہ ابوظہبی کے لیے افتخار احمد، خواجہ نافع، آصف علی، سلمان ارشاد، محمد عامر، عرفات منہاس، عرفان خان نیازی، اعظم خان، شاہنواز دہانی، عباس آفریدی، عاکف جاوید، میر حمزہ، عبید شاہ اور زمان خان کو این او سی جاری کیے گئے ہیں۔
واضح رہے کہ بابر اعظم، محمد رضوان، شاہین شاہ آفریدی، شاداب خان، حارث رؤف اور حسن علی کو پہلے ہی بگ بیش لیگ (بی بی ایل) کے لیے این او سی ملے ہوئے ہیں۔
