نئی دہلی: (دنیا نیوز) جنوبی افریقہ نے بھارتی سرزمین پر 25 سال بعد ٹیسٹ سیریز اپنے نام کرتے ہوئے میزبان ٹیم کو 0-2 سے وائٹ واش کر دیا۔
بھارت کے ’’گھریلو شیر‘‘ مضبوط جنوبی افریقی بولنگ کے سامنے بے بس دکھائی دیئے جبکہ مہمان بیٹرز نے دونوں اننگز میں بہترین کارکردگی دکھا کر سیریز میں مکمل برتری ثابت کی۔
549 رنز کے بھاری ہدف کے تعاقب میں بھارتی ٹیم دوسری اننگز میں صرف 140 رنز پر ڈھیر ہو گئی، اس سے قبل بھارت پہلی اننگز میں محض 201 رنز بنا سکا تھا۔
جنوبی افریقہ نے پہلی اننگز میں 489 رنز سکور کیے جبکہ دوسری اننگز 260 رنز 5 کھلاڑی آؤٹ پر ڈکلیئر کر دی، مہمان ٹیم نے بھارت کو مجموعی طور پر 408 رنز کے بڑے مارجن سے شکست دی۔
واضح رہے کہ پہلے ٹیسٹ میچ میں جنوبی افریقہ نے بھارت کو 30 رنز سے شکست دی تھی، اس قبل جنوبی افریقہ نے 2000 میں بھارت کو اس کی سرزمین پر ٹیسٹ سیریز میں شکست سے دوچار کیا تھا۔
