کراچی: (دنیا نیوز) شہر قائد کے مختلف علاقوں میں مبینہ پولیس مقابلوں کے بعد 4 زخمیوں سمیت 7 ملزمان کو گرفتار کر لیا گیا۔
پولیس کے مطابق گرفتار ملزمان کے قبضے سے اسلحہ، مسروقہ سامان اور موٹر سائیکلیں برآمد کر لی گئیں، میمن گوٹھ پولیس اور سٹریٹ کرمنلز کے درمیان فائرنگ کا تبادلہ ہوا، فائرنگ کے تبادلے کے بعد پولیس نے دو زخمیوں سمیت 3 ملزمان کو گرفتار کر لیا، ملزمان کے قبضے سے اسلحہ، موٹر سائیکل، موبائل فونز اور نقد رقم برآمد کر لی گئی۔
دوسری جانب رضویہ سوسائٹی میں پولیس نے مبینہ مقابلے کے بعد ایک زخمی سمیت 3 ملزمان کو گرفتار کر لیا، ملزمان کے قبضے سے اسلحہ، موبائل فونز اور 2 موٹر سائیکلیں بھی برآمد کر لی گئیں، ادھر سہراب گوٹھ گنا منڈی کے قریب مبینہ مقابلے کے بعد ایک ملزم کو زخمی حالت میں گرفتار کر کیا جبکہ ملزم کا ساتھی موقع سے فرار ہونے میں کامیاب ہو گیا۔
پولیس کا کہنا ہے کہ فرار ملزم کی تلاش جاری ہے جبکہ گرفتار ملزم کے قبضے اسلحہ اور مسروقہ سامان برآمد کر لیا گیا، گرفتار تمام ملزمان کے خلاف مقدمات درج کر کے مزید قانونی کارروائی عمل میں لائی جا رہی ہے۔
