گوجرانوالہ: (دنیا نیوز) رشوت لینے والے ایس ایچ او ،سب انسپکٹر اور اے ایس آئی کو گرفتار کر لیا گیا۔
شہری سے اسٹامپ پیپر پر زبردستی دستخط کروانے اور جبراً رقم وصول کرنے پر کارروائی کی گئی، سٹی پولیس آفیسر محمد ایاز سلیم نے واقعہ پر فوری نوٹس لیتے ہوئے انکوائری کا حکم دیا تھا۔
محمد ایاز سلیم نے ایس ایس پی آپریشنز غیور احمد کو انکوائری کر کے رپورٹ پیش کرنے کی ہدایت کی، انکوائری رپورٹ میں الزام سچ ثابت ہوا، ایس ایچ او دو تفتیشی افسران قصور وار پائے گئے۔
انسپکٹر لقمان، سب انسپکٹر غلام فرید اور اے ایس آئی خالد کو گرفتار کر کے مقدمہ درج کر لیا گیا، مقدمہ میں اغواء، جبراً رقم وصول کرنے اور اختیارات سے تجاوز کی دفعات شامل ہیں۔
سی پی او محمد ایاز سلیم نے کہا کہ محکمہ کی بدنامی کا باعث بننے والی کالی بھیڑوں سے کوئی رعایت نہیں برتی جائے گی، کرپشن و بدعنوانی برداشت نہیں، اختیارات سے تجاوز پر افسر جیل جائیں گے۔
