کراچی: (دنیا نیوز) کراچی کے مختلف علاقوں میں پولیس نے مبینہ مقابلوں اور کارروائیوں کے دوران چار زخمیوں سمیت 6 ملزمان کو گرفتار کر لیا، گرفتار ملزموں کے قبضے سے اسلحہ، مسروقہ سامان اور موٹر سائیکل برآمد کر لی گئی۔
قائد آباد پولیس نے داود چالی کے قریب کارروائی کرتے ہوئے سٹریٹ کرائم کی متعدد وارداتوں میں ملوث ملزم کو گرفتار کر لیا، ملزم کے قبضے سے اسلحہ اور موبائل فونز برآمد کر لئے گئے۔
ادھر ابراہیم حیدری پولیس نے علی اکبر چڑہائی کے قریب مبینہ فائرنگ کے تبادلے کے بعد ایک ملزم کو زخمی حالت میں گرفتار کر لیا جبکہ اس کا ساتھی موقع سے فرار ہو گیا، ملزم کے قبضے سے اسلحہ، نقد رقم اور دیگر سامان برآمد کر لیا گیا۔
بن قاسم پولیس نے مہران ہائی وے کے قریب فائرنگ کے تبادلے کے بعد ایک ملزم کو زخمی حالت میں حراست میں لے لیا جبکہ ملزم کا ساتھی موقع سے فرار ہو گیا، گرفتار ملزم کے قبضے سے اسلحہ، موٹر سائیکل، موبائل فونز اور نقد رقم بھی برآمد کر لی گئی۔
بوٹ بیسن پولیس نے اتوار بازار کے قریب مبینہ مقابلے کے بعد دو زخمیوں سمیت تین ملزمان کو گرفتار کر لیا، گرفتار ملزموں کے قبضے سے اسلحہ، چھینا ہوا سامان برآمد کر لیا، گرفتار تمام ملزموں کے خلاف مختلف نوعیت کے مقدمات درج کر کے مزید قانونی کارروائی کا آغاز کر دیا گیا۔
