راولپنڈی: (دنیا نیوز) راولپنڈی میں تھانہ ٹیکسلا پولیس نے کارروائی کرتے ہوئے ڈکیتی اور موٹر سائیکل چوری کی وارداتوں میں ملوث 4 رکنی بالی گینگ گرفتار کر لیا۔
پولیس کے مطابق گرفتارہونے والے گینگ سے مسروقہ و چھینے گئے 12 موٹر سائیکل، لاکھوں روپے مالیت کے 22 موبائل فون اور ایک لاکھ نقدی، اسلحہ برآمد ہوا ہے۔
ٹیکسلا پولیس کے مطابق گینگ کو ٹیکنیکل و ہیومن انٹیلیجنس ذرائع بروئے کار لاتے ہوئے گرفتار کیا گیا ہے جبکہ گینگ کے انکشاف و نشاندہی پر تمام برآمدگی عمل میں لائی گئی ہے۔
پولیس کا کہنا ہے کہ گینگ نے دوران تفتیش مختلف اضلاع میں 25 سے زائد وارداتوں کا بھی اعتراف کیا اور گینگ ارکان قبل ازیں جڑواں شہروں میں ڈکیتی، چوری اور ناجائز اسلحے کے مقدمات میں ملوث و ریکارڈ یافتہ ہیں۔
ایس پی پوٹھوہار طلحہ ولی نے کہا ہے کہ زیرحراست افراد کو ٹھوس شواہد کے ساتھ چالان عدالت کیا جائے گا۔
