بنوں: (دنیا نیوز) سی ٹی ڈی پر دہشت گردوں نے حملہ کیا جس کے بعد پولیس نے بھرپور جواب دیتے ہوئے 5 دہشتگردوں کو جہنم واصل کر دیا۔
سی ٹی ڈی کے مطابق بنوں ڈومیل ہلال چوک میں سی ٹی ڈی پر دہشت گردوں نے فائرنگ کی تاہم پولیس نے فوری اور بھرپور جوابی ردعمل دیا جبکہ دہشت گرد فائرنگ کے بعد قریبی گھر میں گھس گئے جہاں مزاحمت کے دوران 2 شہریوں کو شہید کر دیا۔
سی ٹی ڈی نے بتایا کہ بنوں ریجن، بنوں پولیس اور سکیورٹی فورسز نے مشترکہ کلیئرنس آپریشن کیا اور 8 گھنٹے طویل آپریشن میں تمام 5 دہشت گرد ہلاک ہوگئے اور ان کے قبضے سے اسلحہ اور بارود برآمد کرلیا گیا، ایک دہشت گرد کی شناخت رسول عرف کمانڈر اریانہ کے نام سے ہوئی جبکہ دیگر دہشت گردوں کی شناخت جاری ہے۔
دہشت گردوں کے حوالے سے بتایا گیا کہ 2 دہشت گرد ابتدائی مقابلے میں ہی مارے گئے تھے اور باقی گھر میں گھس کر انجام کو پہنچے، شہریوں نے پولیس اور فورسز پر بھرپور اعتماد کا اظہار کیا اور دہشت گردی کے خاتمے تک فورسز کے شانہ بشانہ کھڑے رہنے کے عزم کا اظہار کیا۔
