لاہور: (دنیا نیوز) لاہور پولیس کا ایک اور اہلکار جرائم پیشہ نکلا، ریس کورس کے علاقہ میں واردات کے بعد فرار ہوتے ہوئے پولیس کانسٹیبل اہل علاقہ کے ہتھے چڑھ گیا۔
مقامی لوگوں نے درگت بنا ڈالی، ملزم کو ریس کورس پولیس کے حوالے کر دیا گیا، واقعہ کی موبائل ویڈیو منظر عام پر آگئی۔
ایف آئی آر کے مطابق واردات کلب روڈ کے رہائشی شہری غلام محمد کے گھر میں ہوئی، ملزم کی شناخت پولیس کانسٹیبل مرزا حماد بیگ کے نام سے ہوئی۔
ملزم پولیس اہلکار پولیس لائنز جنرل ڈیوٹی پر مامور ہے، ملزم کے قبضے سے پستول اور پولیس نمبر پلیٹ والی موٹر سائیکل بھی برآمد ہوئی۔
ایف آئی آر کے مطابق چند ہفتے قبل اسی طرح کی ایک واردات اسی محلے کے مکین کاشف کے گھر میں بھی ہوئی تھی۔
موبائل ویڈیو میں اہل علاقہ ملزم اور اس کا محکمانہ کارڈ دکھا رہے ہیں۔
