پشاور: (ویب ڈیسک) پشاور میں اندھا دھند فائرنگ کرکے عالم دین کو کمسن بیٹے سمیت قتل کر دیا گیا۔
تھانہ پشتہ خرہ پولیس کے مطابق عالم دین قاری عزت اللہ سفید ڈھیری میں واقع مدرسے میں نماز جمعہ کی ادائیگی کے بعد اپنے دو بیٹوں کے ہمراہ کار میں گھر جارہے تھے کہ بورڈ بازار میں موٹرسائیکل سوار افراد نے ان پر فائرنگ کردی۔
پولیس کے اعلیٰ حکام نے بتایا کہ فائرنگ کے نتیجے میں قاری عزت اللہ ساکن فیز 2 اور بیٹاعلی جاں بحق جبکہ دوسرا بیٹا مرتضیٰ زخمی ہوگیا، لاشوں اور زخمی کو ہسپتال منتقل کردیا گیا جہاں زخمی کو طبی امداد دی جا رہی ہے۔
پولیس کے مطابق موٹرسائیکل سوار افراد کی اندھا دھند فائرنگ سے علاقے میں خوف و ہراس پھیل گیا تھا، ایس پی کینٹ احتراز خان پولیس نفری سمیت جائے وقوعہ پہنچ گئے تھے جہاں سے اہم شواہد اکٹھے کرلئے گئے ہیں اور قریبی علاقوں میں لگے سی سی ٹی وی کیمروں کی ریکارڈنگ حاصل کرکے نامعلوم افراد کے خلاف مقدمہ درج کرلیا گیا۔
ان کا کہنا تھا کہ واقعہ کا ٹارگٹ کلنگ سمیت مختلف پہلوؤں پر تفتیش کا آغاز کر دیا گیا ہے جبکہ ملزموں کی تلاش کیلئے ٹیمیں تشکیل دیدی گئی ہیں ملزموں کو جلد گرفتار کر لیا جائے گا۔
