بہاولنگر: (دنیا نیوز) چک نمبر 48 تھری آر کے قریب مبینہ پولیس مقابلہ ہوا، ایک ملزم کو زخمی حالت میں گرفتار کر لیا گیا جبکہ 2 فرار ہونے میں کامیاب ہوگئے۔
پولیس حکام نے بتایا کہ منشیات فروشوں کی گرفتاری کیلئے ناکہ بندی کی گئی تھی، منشیات فروشوں نے پولیس پارٹی پر فائرنگ کر دی، پولیس مقابلہ میں ایک منشیات فروش اپنے ہی ساتھیوں کی فائرنگ سے زخمی ہوا۔
پولیس حکام کا مزید کہنا تھا کہ گرفتار ملزم منشیات کے 12 مقدمات میں ریکارڈ یافتہ ہے، ملزم سے بھاری مقدار میں چرس اور ناجائز اسلحہ بھی برامد کر لیا گیا، گرفتار ملزم کی غلام فرید کے نام سے شناخت ہوئی ہے۔
پولیس حکام نے بتایاکہ ملزم کے فرار ہونے والے ساتھیوں کو پکڑنے کیلئے بھی کارروائی شروع کر دی گئی ہے اور انہیں حراست میں لے لیا جائے گا، ملزموں کے خلاف مزید تحقیقات شروع کر دی ہے۔
