اسلام آباد: (دنیا نیوز) فیڈرل ٹیکس آفس میں کرپشن کا معاملہ، ڈسٹرکٹ اینڈ سیشن کورٹس نے ایف آئی اے کی جانب سے گرفتار 20 ملزمان کو عدالت میں پیش کر دیا گیا۔
عدالت نے تمام ملزمان کو 3 دن کے جسمانی ریمانڈ پر ایف آئی اے کے حوالے کر دیا، جوڈیشل مجسٹریٹ احمد شہزاد گوندل کی عدالت میں ملزمان کو پیش کیا گیا۔
ایف آئی اے کی جانب سے ملزمان کے 14 دن کے جسمانی ریمانڈ کی استدعا کی گئی تھی، ایف آئی اے اینٹی کرپشن سرکل اسلام آباد نے سرکاری خزانے میں فیس جمع نہ کروانے کے الزام میں 71 ملزمان کے خلاف مقدمہ درج کر رکھا ہے۔
ایف آئی اے نے 20 ملزمان کو گزشتہ روز مختلف کارروائیوں کے دوران گرفتار کیا تھا، عدالت پیش ہونے والے ملزمان میں 9 سرکاری اہلکار بھی شامل ہیں، گرفتار ملزمان میں 4 سینئر آڈیٹر، 1 اسسٹنٹ اکاؤنٹ آفیسر شامل ہے۔
مقدمہ کے متن کے مطابق گرفتار ملزمان نے فیڈرل ٹیکس آفس اسلام آباد کے افسران و اہلکاروں کی ملی بھگت سے کروڑوں روپے کی کرپشن کی، ملزمان نے جعلی TR-32 چالان فارم کے ذریعے اسٹامپ پیپرز، کورٹ فیس اور فارن بلز غیر قانونی طور پر جاری کیے۔
ملزمان نے سرکاری خزانے میں مقررہ فیس جمع کروائے بغیر مالی مفاد حاصل کیا، ملزمان نے اپنے عہدوں کا ناجائز استعمال کرتے ہوئے قومی خزانے کو بھاری نقصان پہنچایا۔
ابتدائی تخمینے کے مطابق قومی خزانے کو تقریباً 29 کروڑ 65 لاکھ روپے کا نقصان پہنچایا گیا، یہ رقم 2,638 جعلی اور بوگس TR-32 فارموں کے اجرا کے ذریعے خورد برد کی گئی۔
مزید نقصان کا تخمینہ ایف ٹی او اسلام آباد کے گزشتہ 10 سال کے فرانزک آڈٹ کے بعد طے کیا جائے گا۔
