لاہور: (دنیا نیوز) معروف ڈرامہ پروڈیوسر اور ڈائریکٹر نصرت ٹھاکر کو دنیا سے رخصت ہوئے 16 برس بیت گئے۔
نصرت ٹھاکر 1937 میں لاہور میں پیدا ہوئے اور اپنی عملی زندگی کا آغاز ریڈیو پاکستان سے کیا، پھر پاکستان ٹیلی ویژن سے بطور ڈیوٹی آفیسر وابستہ ہو گئے، وہ اسسٹنٹ پروڈیوسر بھی رہے اور بعد ازاں مکمل پروڈیوسر بن گئے، نصرت ٹھاکر نے بطور جنرل مینیجر پی ٹی وی لاہور سنٹر بھی خدمات سرانجام دیں۔
نصرت ٹھاکر نے کئی لازوال ڈراموں کی پیش کش اور ہدایات دیں، ان کی شہرت کا آغاز امجد اسلام امجد کی تحریر کردہ ڈراما سیریل وارث سے ہوا، اس سیریل کا آغاز غضنفر علی نے کیا تاہم چند قسطوں کے بعد اس سیریل کی ذمہ داری نصرت ٹھاکر کے کندھوں پر آگئی جنہوں نے اسے پی ٹی وی کی یادگار ڈراما سیریل بنا دیا۔
نصرت ٹھاکر کی دیگر ڈراما سیریلز میں دہلیز، سمندر، پیاس، خواہش، نشیمن، دنیا اور غلام گردش نمایاں ہیں، ڈراما سیریل اندھیرا اجالا بھی بے حد مقبول ہوئی، نصرت ٹھاکر 7 نومبر 2009 کو لاہور میں انتقال کر گئے اور لاہور کینٹ قبرستان میں آسودہ خاک ہیں۔
