بھارتی میڈیا نے دھرمیندر کے انتقال کی خبریں چلا دیں، ہیما مالنی، اور ایشا دیول برہم

ممبئی: (ویب ڈیسک) بھارتی میڈیا نے غیر ذمہ داری کا مظاہرہ کرتے ہوئے بالی وڈ کے لیجنڈری اداکار دھرمیندر کی 89 سال کی عمر میں انتقال کی خبریں شائع اور نشر کر دیں جن کی ہیما مالنی اور ایشا دیول نے تردید کر دی۔

دھرمیندر کی اہلیہ ہیما مالنی نے اپنے ٹوئٹ میں شدید برہمی کا اظہار کرتے ہوئے انتقال کی خبروں کی تردید کی اور کہا کہ جو کچھ ہو رہا ہے وہ ناقابل معافی ہے، ذمہ دار چینلز ایسے شخص کے بارے میں جھوٹی خبریں کیسے پھیلا سکتے ہیں جس کا علاج ہو رہا ہے اور وہ صحت یاب ہو رہے ہیں۔

ماضی کی خوبرو اداکارہ نے مزید کہا کہ یہ تذلیل اور غیر ذمہ دارانہ عمل ہے، براہ کرم ہماری فیملی کو پرائیویسی دیں۔

دوسری جانب دھرمیندر کی بیٹی ایشا دیول کی جانب سے کچھ دیر پہلے انسٹاگرام پر پیغام جاری کیا گیا جس میں انہوں نے والد کے انتقال کی خبریں شائع کرنے پر برہمی کا اظہار کیا اور انتقال کی تردید کی۔

انہوں نے کہا کہ سب سے گزارش ہے کہ ہماری فیملی کی پرائیویسی کو مدنظر رکھا جائے اور میرے والد کی مکمل صحت یابی کے لیے دعا کی جائے۔

قبل ازیں انڈیا ٹوڈے نے رپورٹ دی تھی کہ اداکار کی ٹیم نے آج صبح ان کی موت کی تصدیق کر دی، دھرمیندر کو گزشتہ روز ممبئی کے بریچ کینڈی ہسپتال میں داخل کرایا گیا تھا جہاں وہ وینٹی لیٹر پر تھے۔

بھارتی میڈیا کا کہنا ہےکہ دھرمیندرا کو گزشتہ ہفتے بھی سانس لینے میں دشواری کے باعث ہسپتال منتقل کیا گیا تھا جب کہ رواں سال اپریل میں ان کی آنکھ کی سرجری بھی ہوئی تھی۔

واضح رہے کہ دھرمیندر نے اپنے کیریئر کا آغاز 1960 میں فلم دل بھی تیرا ہم بھی تیرے سے کیا تھا۔ انہیں 2012 میں حکومت ہند کی جانب سے ہندوستان کے تیسرے سب سے بڑے شہری اعزاز پدم بھوشن سے نوازا گیا تھا۔

چھ دہائیوں پر محیط اپنے کیریئر میں دھرمیندر نے شعلے، یادوں کی بارات، میرا گاوں میرا دیش، نوکر بیوی کا، پھول اور پت، پھول اور پتلی جیسی ایوارڈ یافتہ فلمیں کیں۔

وہ پنجاب کے ضلع لدھیانہ کے ایک گاؤں میں دھرمیندر کیول کرشن دیول کے نام سے پیدا ہوئے، انہوں نے فلم انڈسٹری میں قدم رکھنے سے پہلے 19 سال کی عمر میں 1954 میں پرکاش کور سے شادی کی۔

بعدازاں انہیں اداکارہ ہیما مالنی سے پیار ہو گیا جس سے انہوں نے شادی کر لی، دھرمیندر نے آخری بار اپنی اداکاری کے جوہر فلم اکیس میں دکھائے جو 25 دسمبر کو ریلیز ہونے والی ہے۔

89 سال کی عمر میں بھی دھرمیندر سوشل میڈیا پر سرگرم رہے، وہ اکثر ایسی ویڈیوز شیئر کرتے رہے جو صحت مند زندگی کو فروغ دیتے ہیں، ان کی انسٹاگرام پوسٹس میں سے بہت سے انہیں ٹریکٹر چلاتے ہوئے، اپنے فارم کی دیکھ بھال کرتے ہوئے، اور اپنے مداحوں کو سادہ زندگی کے اسباق اور کاشتکاری کے مشورے پیش کرتے ہوئے دیکھا گیا۔