اداکار گووندا کی طبیعت اچانک خراب، بے ہوشی کی حالت میں ہسپتال منتقل

ممبئی: (ویب ڈیسک) بالی ووڈ کے معروف اداکار گووندا کو بے ہوشی کی حالت میں ہسپتال منتقل کر دیا گیا۔

بھارتی میڈیا کے مطابق 61 سالہ اداکار گزشتہ شب طبی پیچیدگیوں اور ذہنی تناؤ کے باعث ہوش و حواس کھو بیٹھے تھے، جس کے بعد انہیں فوری طور پر ممبئی کے علاقے جوہو میں واقع کرٹی کیئر ہسپتال منتقل کیا گیا تھا۔

گووندا کے قریبی دوست اور قانونی مشیر بندل نے بھارتی میڈیا سے گفتگو میں تصدیق کی کہ اداکار کو رات گئے تقریباً ایک بجے ایمرجنسی میں ہسپتال لایا گیا تھا، گھر پر پہلے ڈاکٹر سے فون پر مشورہ کیا گیا اور دوا دی گئی، لیکن حالت سنبھل نہ سکی تو ہسپتال منتقل کرنا پڑا۔

ان کا کہنا تھا کہ گووندا کے متعدد ٹیسٹ کئے گئے ہیں اور اب ان کی رپورٹس کا انتظار ہے۔

یاد رہے کہ گزشتہ سال اکتوبر میں بھی گووندا ایک حادثے کا شکار ہوئے تھے جب ان کی لائسنس یافتہ پستول غلطی سے چل گئی تھی اور ان کی ٹانگ میں گولی لگ گئی تھی، جس کے بعد ان کو ہسپتال میں داخل کیا گیا تھا جہاں ایک گھنٹے کے آپریشن کے بعد ان کی ٹانگ سے گولی نکالی گئی تھی۔