سنیتا آہوجا کا اپنے شوہر گووندا کے معافی مانگنے پر ناگواری کا اظہار

ممبئی: (ویب ڈیسک) بالی وڈ اداکار گووندا کی اہلیہ سنیتا آہوجا نے خاندانی پنڈت کے خلاف دیے گئے اپنے بیان کو لے کر گووندا کے عوام سے سامنے معافی مانگنے کے عمل پر ناگواری کا اظہار کیا ہے۔

کچھ روز قبل سنیتا آہوجا نے اپنے ایک پوڈ کاسٹ میں جعلی پنڈتوں سے متعلق بات کر تے ہوئے کہا تھا کہ ہمارے گھر میں بھی ایسے ہی ایک شخص موجود ہیں، وہ گووندا کے پنڈت ہیں، جو جعلی ہیں، اور پوجا کے 2 لاکھ روپے لیتے ہیں، گووندا نے سنیتا کے خاندانی پنڈت کے خلاف دیے گئے بیان کی مذمت کرتے ہوئے عوامی سطح پر معافی کی پیشکش کی تھی۔

بالی وڈ اداکار نے انسٹا گرام سٹوریز پر ایک ویڈیو بیان شیئر کیا تھا جس میں انہوں نے اپنے پنڈت کی مہارت اور اپنے خاندان کے ساتھ ان کے طویل تعلق کا تفصیل سے ذکر کیا تھا۔

تاہم اب اپنے نئے ویڈیو پیغام میں سنیتا نے کہا ہے کہ مجھے گووندا کی معافی بالکل پسند نہیں آئی، میں کافی سن رہی ہوں کہ میں نے کچھ غلط الفاظ استعمال کیے ہیں، میرے قابلِ احترام شوہر گووندا جی نے بھی ہاتھ جوڑ کر معافی مانگی ہے، ان کا یہ عمل مجھے بالکل اچھا نہیں لگا کیونکہ میں کبھی نہیں چاہوں گی کہ وہ کبھی کسی کے سامنے میرے لیے ہاتھ جوڑیں۔

سنیتا آہوجا نے مزید کہا کہ میں نے کسی کا نام نہیں لیا تھا کہ خاص طور پر میں نے کسی کے بارے میں وہ بات کہی، میرے ساتھ کچھ واقعات پیش آئے تھے جس پر میں نے ردِعمل کا اظہار کیا، اگر آپ لوگوں کو برا لگا ہو تو میں گروجی سے ہاتھ جوڑ کر معافی مانگنا چاہتی ہوں، اب گووندا جی کے 3، 3 پنڈت ہیں، ان کو یہ صفائی دینے کی کوئی ضرورت نہیں تھی۔