میری معمولی باتوں کو غلط رنگ دیا جاتا، اب سوچ سمجھ کر گفتگو کرتی ہوں: ماہرہ خان

کراچی: (ویب ڈیسک) پاکستان کی صفِ اول کی اداکارہ ماہرہ خان نے اس بات کا انکشاف کیا ہے کہ سوشل میڈیا پر اُن کی معمولی باتیں بھی غلط رنگ دے کر پیش کی جاتی ہیں۔

ماہرہ نے اپنی نئی فلم کی پروموشن کے دوران گفتگو میں ایک واقعہ یاد کرتے ہوئے بتایا کہ ’میں نے ایک بار بس ایسے ہی کہہ دیا تھا کہ میری نانی کہتی تھیں سلیو لیس نہ پہنو، اب جب بھی میں سلیو لیس تصویر ڈالتی ہوں تو لوگ فوراً کمنٹ کرتے ہیں کہ نانی کو بھول گئیں؟‘

اداکارہ نے کہا کہ اُن کے یہ جملے نہ تو کسی کے خلاف تھے اور نہ ہی کوئی بیانیہ بنانے کیلئے تھے، لیکن سوشل میڈیا کے کچھ حلقوں نے انہیں تنقید کا بہانہ بنا لیا ہے، انہوں نے اعتراف کیا کہ اب وہ بہت سوچ سمجھ کر گفتگو کرتی ہیں۔

ان کا کہنا تھا کہ آج کل میں سوالوں سے بچتی ہوں اور اگر بات کروں تو الفاظ بڑی احتیاط سے چنتی ہوں، کیونکہ مجھے معلوم ہے کہ ایک چھوٹی سی بات بھی غلط انداز میں پھیلائی جاسکتی ہے۔

ماہرہ خان نے کہا کہ وہ اپنی نجی حدود اور خاندان سے جڑے موضوعات پر اب مزید محتاط ہوگئی ہیں، تاکہ کسی کیلئے بھی اُن کی بات کو غلط مطلب پہنچانے کا موقع نہ رہے۔