لاہور: (ویب ڈیسک) سٹیٹ بینک آف پاکستان کی طرف سے عوام کو آگاہ کیا گیا ہے کہ بینکوں سے ایک دن کے دوران ایک ہزا روپے نکلوانے والے میسج جعلی ہیں۔
سٹیٹ بینک آف پاکستان نے خود سے منسوب سوشل میڈیا پر گردش کرنے والے اس پیغام کی تردید کی ہے جس میں کہا گیا ہے کہ اے ٹی ایم سے رقم نکلوانے کی حد ایک ہزار روپے مقرر کی گئی ہے۔
بینک اکاؤنٹ رکھنے والے صارفین کی جانب سے یہ شکایت سامنے آئی تھی کہ انہیں موبائل پر ایک نمبر سے میسج موصول ہو رہا ہے جس میں کہا گیا ہے کہ سٹیٹ بینک آف پاکستان کی ہدایات کے مطابق 23 جنوری سے 31 جنوری تک اے ٹی ایم سے رقم نکلوانے کی حد ایک ہزار روپے مقرر کر دی گئی ہے۔
2/2 SBP does not put any limit on ATM withdrawal limit. Banks decide about such limits.
— SBP (@StateBank_Pak) January 22, 2021
سٹیٹ بینک آف پاکستان کے ٹوئٹر اکاؤنٹ سے اس حوالے سے ایک پیغام میں کہا ہے کہ سٹیٹ بینک آف پاکستان خود سے منسوب سوشل میڈیا پر گردش کرنے والے اس غلط میسج کو واضح طور پر مسترد کرتا ہے جس میں کہا گیا ہے کہ اے ٹی ایم سے رقم نکالنے کی حد ایک ہزار روپے مقرر کر دی گئی ہے۔
ٹوئٹر اکاؤنٹ پر مزید کہا گیا ہے کہ سٹیٹ بینک نے اے ٹی ایم سے رقم نکالنے پر کوئی حد مقرر نہیں کی، اس کا تعین بینک ہی کرتے ہیں۔
