کراچی: (دنیا نیوز) ترجمان سندھ حکومت سعدیہ جاوید نے شاہراہِ بھٹو کے ڈوب جانے کی خبروں کی سختی سے تردید کر دی۔
اپنے بیان میں ترجمان صوبائی حکومت سعدیہ جاوید کا کہنا تھا کہ میں نے اپنے سفر کا آغاز شاہراہِ بھٹو سے کیا ہے اور آپ سب دیکھ سکتے ہیں کہ شاہراہِ بھٹو مکمل طور پر فعال ہے اور ٹریفک رواں دواں ہے، عوام سے گزارش ہے کہ افواہوں پر دھیان نہ دیں۔
انہوں نے کہا کہ شاہراہ کے بعض بننے والے حصوں میں معمولی اونچ نیچ موجود ہے جسے جلد درست کر دیا جائے گا، نئی شاہراہیں بننے کے بعد معمولی ٹوٹ پھوٹ فطری عمل ہے، جو نشاندہی ہوتے ہی فوراً درست کر دی جاتی ہے، شہر کی مجموعی صورتِ حال بہتر ہے اور کل سے جاری بارش کے باوجود تمام مرکزی سڑکیں کلیئر ہیں،شہر کو سانپ کی طرح ڈسنے والے ہمیشہ روتے ہی رہیں گے۔
ایم کیو ایم کے رہنماؤں پر تنقید کرتے ہوئے ان کا کہنا تھا کہ وہ ایک دوسرے کو نیچا دکھانے کیلئے جھوٹ پر جھوٹ بول رہے ہیں، “جب یہ لوگ تنقید کر کے آرام سے سو رہے تھے تو جیالا میئر، منتخب نمائندے اور انتظامیہ صبح 6 بجے تک سڑکوں پر موجود تھے، ماضی میں خون کی برسات کرنے والوں کیلئے بارش بھی ہمیشہ بری ہی لگے گی۔
سعدیہ جاوید نے مزید کہا کہ کل گورنر صاحب کی کمی جماعتِ اسلامی کے ٹاؤن چیئرمین نے پوری کر دی، اپنی گاڑیوں پر دھکے لگا کر میڈیا فوٹیجز بنانے میں مصروف تھے،لیاری اور ملیر ندی سے متاثرہ عوام کیلئے سندھ حکومت ہر ممکن تعاون اور بندوبست کر رہی ہے، عوام سے اپیل ہے کہ کسی بھی قسم کی افواہوں پر کان نہ دھریں۔
