ریاض: (دنیا نیوز) سوشل میڈیا پر وائرل ہونے والی سعودی عرب کے ’سکائی سٹیڈیم‘ کی ویڈیو جعلی نکل آئی، مصنوعی ذہانت سے بنی ویڈیو کو دنیا بھر میں 5 کروڑ سے زائد بار دیکھا جا چکا ہے.
عرب میڈیا کے مطابق سعودی عرب میں نیوم سٹی کے ’سکائی سٹیڈیم‘ کی سوشل میڈیا پر وائرل ویڈیو کا سعودی حکومت کے کسی سرکاری منصوبے سے کوئی تعلق نہیں ہے، ویڈیو بنانے والے شخص نے بتایا کہ سکائی سٹیڈیم کی وائرل ویڈیو مصنوعی ذہانت کی مدد سے تیار کی گئی ہے اور محض تخیلاتی ہے۔
مصنوعی ذہانت سے بنی ویڈیو کو 2034ء ورلڈ کپ کے سٹیڈیم کا ڈیزائن سمجھ لیا گیا تھا، سکائی سٹیڈیم کی اے آئی ویڈیو بنانے والے شخص نے میڈیا سے گفتگو میں کہا کہ یہ صرف ایک اے آئی تصور ہے اور اُسے سعودی عرب کے کسی منصوبے کا علم نہیں ہے۔
خیال رہے کہ سکائی سٹیڈیم کی اے آئی ویڈیو کو دنیا بھر میں 5 کروڑ سے زائد بار دیکھا جا چکا ہے، تاہم یہاں یہ بات قابلِ ذکر ہے کہ سعودی حکومت 2034ء کے عالمی کپ کیلئے 15 اسٹیٹ آف دی آرٹ اسٹیڈیمز کی تعمیر کا ارادہ رکھتی ہے جن میں سے ایک نیوم میگا سٹی میں کلاؤڈ سٹڈیم بھی شامل ہے۔
رپورٹس کے مطابق یہ سٹیڈیم زمین سے تقریباً 350 میٹر (1 ہزار 150 فٹ) کی بلندی پر تعمیر کیا جائے گا جس میں 46 ہزار تماشائیوں کے بیٹھنے کی گنجائش ہوگی اور اس کو مکمل طور پر سولر اور ونڈ پاور کے ذریعے بجلی سپلائی کی جائے گی۔
اس حوالے سے سرکاری ذرائع کا بھی کہنا ہے کہ نیوم سٹی میں سٹیڈیم کی تعمیر کا آغاز 2027ء میں ہوگا جبکہ اس کی تعمیر 2032ء میں تکمیل کو پہنچے گی۔
