پشاور: (دنیا نیوز) خیبرپختونخوا میں ڈینگی سے متاثرہ افراد کی تعداد میں اضافہ ہونے لگا، صوبہ بھر میں ایک ہزار 456 مثبت کیسز کی تصدیق ہو گئی، 123 مریض مختلف ہسپتالوں میں زیر علاج ہیں، صوبے میں ڈینگی سے پہلی موت کی بھی تصدیق ہوئی ہے۔
محکمہ صحت خیبر پختونخوا کے مطابق صوبہ بھر میں ڈینگی کیسز سے متاثرہ افراد کی تعداد میں اضافے کا سلسلہ جاری ہے، صوبہ بھر میں 14 ہزار سے زائد مشتبہ کیسز رپورٹ ہوئے، سکریننگ کے بعد ایک ہزار456 افراد میں ڈینگی کی تصدیق ہوئی ہے۔ رپورٹ کے مطابق صوبہ کے مختلف ہسپتالوں میں 123 مریض زیر علاج ہیں، نوشہرہ میں ڈینگی کے 318، پشاور میں 317 اور بونیر میں 212 افراد میں ڈینگی وائرس کی تصدیق ہوئی ہے۔
پشاور کے ہسپتالوں میں ڈینگی سے متاثرہ مریضوں کی تعداد میں اضافہ ہورہا ہے، حیات آباد میڈیکل کمپلیکس ترجمان کے مطابق ہسپتال میں ڈینگی کے 11 مریض زیر علاج ہیں، ہسپتال میں 24 گھنٹوں میں ڈینگی کے 416 ٹیسٹ کیے گئے جن میں ایک سو افراد میں ڈینگی مثبت آیا، خیبر ٹیچنگ ہسپتال انتظامیہ کے مطابق ڈینگی سے متاثرہ 25 مریض زیرعلاج ہیں، متاثرہ افراد میں 9 خواتین اور 16 مرد شامل ہیں۔
گذشتہ 24 گھنٹوں کے دوران ڈینگی کے 944 ٹیسٹ کئے گئے جن میں 256 افراد کے ٹیسٹ مثبت جبکہ 688 کے منفی آئے، خیبر پختونخوا میں گزشتہ روز ڈینگی وائرس سے ایبٹ آباد میں ایک شخص جاں بحق ہوا ہے۔
