راولپنڈی: (دنیا نیوز) راولپنڈی میں ڈینگی وائرس کا حملہ موسمی تبدیلیوں کے باوجود مسلسل جاری ہے جہاں گزشتہ 24 گھنٹوں کے دوران ڈینگی کے مزید 30 مریض سامنے آئے ہیں، اس کے ساتھ ہی شہر میں ڈینگی کے مریضوں کی کل تعداد 865 ہو گئی۔
اس وقت مختلف ہسپتالوں میں ڈینگی کے 75 مریض زیر علاج ہیں جن کی حالت تسلی بخش بتائی جا رہی ہے، ڈینگی کے خاتمے کے لیے محکمہ صحت کی 1361 ٹیمیں میدان میں مصروف عمل ہیں جو مسلسل احتیاطی تدابیر پر عملدرآمد کروانے میں مصروف ہیں۔
اب تک 55 لاکھ 90 ہزار 264 گھروں کی چیکنگ کی جا چکی ہے جن میں سے ایک لاکھ 75 ہزار 412 گھروں سے ڈینگی کے لاروا برآمد ہوئے ہیں، اس کے علاوہ 15 لاکھ 30 ہزار 631 مقامات کی چیکنگ کے دوران 23 ہزار 536 مقامات سے لاروا دریافت ہوئے ہیں۔
محکمہ صحت کی جانب سے ڈینگی کے معیاری آپریٹنگ طریقہ کار کی خلاف ورزی پر 4450 مقدمات درج کیے گئے ہیں جبکہ مسلسل خلاف ورزی پر 1850 مقامات کو سیل کیا گیا ہے۔
ڈینگی کے رواں سیزن میں احتیاطی تدابیر کی خلاف ورزی پر ایک کروڑ 87 لاکھ 4507 روپے جرمانے کی صورت میں حکومتی خزانے میں جمع ہوئے ہیں، یہ اقدامات ڈینگی مچھر کے پھیلاؤ کو روکنے کے لیے کیے جا رہے ہیں۔
حکام نے عوام سے اپیل کی ہے کہ وہ ڈینگی سے بچاؤ کے لیے احتیاطی تدابیر پر عمل کریں اور اپنے گھروں کے اردگرد صفائی کا خاص خیال رکھیں، محکمہ صحت کی ٹیمیں شہر بھر میں اسپرے مہم بھی جاری رکھے ہوئے ہیں۔
