اسلام آباد: (دنیا نیوز) سال 2025 کی پانچویں اور آخری قومی پولیو مہم کا آج سے ملک بھر میں باقاعدہ آغاز ہوگیا۔
نیشنل ایمرجنسی آپریشن سینٹر کے مطابق پولیو مہم 15 دسمبر سے 21 دسمبر تک جاری رہے گی، مہم کے دوران 4 کروڑ 50 لاکھ سے زائد 5 سال سے کم عمر بچوں کو پولیو کے قطرے پلانے کا ہدف مقرر کیا گیا ہے۔
این ای او سی کا کہنا ہے کہ پنجاب میں 2 کروڑ 30 لاکھ سے زائد، سندھ میں 1 کروڑ 6 لاکھ سے زائد، خیبر پختونخوا میں 72 لاکھ سے زائد اور بلوچستان میں 26 لاکھ سے زائد بچوں کو پولیو سے بچاؤ کے قطرے پلائے جائیں گے۔
اسی طرح وفاقی دارالحکومت اسلام آباد میں 4 لاکھ 60 ہزار سے زائد، گلگت بلتستان میں 2 لاکھ 28 ہزار سے زائد جبکہ آزاد جموں و کشمیر میں 7 لاکھ 60 ہزار سے زائد بچوں کو پولیو کے قطرے پلانے کا ہدف رکھا گیا ہے۔
نیشنل ای او سی نے بتایا کہ رواں سال اب تک ملک میں 30 بچوں میں پولیو وائرس کی تصدیق ہو چکی ہے جو اس مہلک مرض کے خلاف حفاظتی اقدامات کی اہمیت کو اجاگر کرتی ہے۔
ادارے نے والدین سے اپیل کی ہے کہ وہ پولیو ورکرز کے لیے اپنے گھروں کے دروازے کھولیں اور اپنے 5 سال سے کم عمر بچوں کو پولیو کے 2 قطرے لازمی پلوائیں، پیدائش سے 15 ماہ تک کے تمام بچوں کے حفاظتی ٹیکوں کا کورس بروقت مکمل کرانا نہایت ضروری ہے تاکہ بچوں کو پولیو سمیت دیگر خطرناک بیماریوں سے محفوظ رکھا جا سکے۔
