لاہور: (دنیا نیوز) پنجاب اسمبلی میں حکومتی اتحاد کو بڑا جھٹکا لگ گیا، سپیکر نے سپریم کورٹ کے فیصلے کی روشنی میں حکومتی اتحاد کو ملنے والی خواتین اور اقلیتوں کی مخصوص نشستیں معطل کر دیں۔
پنجاب اسمبلی میں حکومتی اتحاد کے معطل ہونے والے ارکان کی تعداد 27 ہے، سپیکر نے ارکان کی معطلی کے حکم پر آج سے عملدرآمد کرنے کا حکم دے دیا۔
سنی اتحاد کونسل نے ڈیسک بجا کر سپیکر کی رولنگ کا خیر مقدم کیا، سپیکر پنجاب اسمبلی نے ایوان میں سپریم کورٹ کا فیصلہ پڑھ کر سنایا۔
ملک احمد خان نے اپوزیشن کے مخصوص نشستوں پر پوائنٹ آف آرڈر کو درست قرار دے دیا۔
226 ارکان کے ساتھ اسمبلی کے ایوان میں سب سے زیادہ نشستیں رکھنے والی ن لیگ کے 23 ارکان معطل ہوئے، ایوان میں ن لیگ کے حمایتی ارکان کی تعداد 203 رہ گئی۔
پیپلز پارٹی کی پنجاب میں 16 سیٹیں تھیں، 2 ارکان کم ہونے سے 14 ارکان رہ گئے،مسلم لیگ ق کی 11 نشستوں میں سے 1 کم ہو کر 10 رہ گئیں۔
استحکام پاکستان پارٹی کی 1 نشست کم، ارکان کی تعداد 6 رہ گئی، پنجاب اسمبلی میں سنی اتحاد کونسل کی 103 نشستیں ہیں، معطل ارکان کی 27 نشستیں ملیں تو ارکان کی تعداد 130 ہو جائیگی۔
