لاہور، اسلام آباد، کراچی، کوئٹہ (دنیا نیوز) ملک بھر میں مون سون بارشوں کا چوتھا سپیل کل شروع ہونے جا رہا ہے جس کے باعث پنجاب، خیبر پختونخوا، سندھ اور بلوچستان کے متعدد علاقوں میں شدید بارشوں اور آندھی کا امکان ہے۔
محکمہ موسمیات کے مطابق پنجاب، سندھ، گلگت بلتستان، بلوچستان اور خیبرپختونخوا کے بعض علاقوں میں آج بھی بارش کی توقع ہے۔
پراونشل ڈیزاسٹر مینجمنٹ اتھارٹی پنجاب نے تمام ضلعی انتظامیہ کو ہائی الرٹ جاری کر دیا ہے جبکہ دریائے سندھ میں مختلف مقامات پر سیلابی کیفیت پیدا ہو گئی ہے۔
پنجاب میں شدید بارشوں کی پیشگوئی
پی ڈی ایم اے پنجاب کے ترجمان کے مطابق 20 سے 25 جولائی کے دوران لاہور، راولپنڈی، مری، گلیات، اٹک، چکوال، منڈی بہاؤالدین، گجرات، جہلم، گوجرانوالہ، فیصل آباد، سیالکوٹ، نارووال، جھنگ، سرگودھا، میانوالی، ڈیرہ غازی خان، بہاولپور، بہاولنگر اور ملتان میں بارشیں متوقع ہیں۔
ڈی جی پی ڈی ایم اے عرفان علی کاٹھیا کے مطابق بارشوں کے باعث دریائے سندھ میں تربیلا، کالاباغ اور چشمہ کے مقامات پر نچلے اور درمیانے درجے کے سیلاب کی صورتحال پیدا ہو چکی ہے جبکہ چشمہ کے مقام پر اونچے درجے کے سیلاب کا خدشہ ہے۔
پپلاں میں دریا کا پانی داخل، فصلیں تباہ، 223 افراد ریسکیو
کالاباغ کے مقام پر دریائے سندھ کا پانی قریبی علاقوں کمر مشانی، مدت والا، چھینہ پوڑا، کچہ گجرات اور ڈھینگانہ میں داخل ہو چکا ہے، ہزاروں ایکڑ پر کھڑی فصلیں زیر آب آ گئیں، ریسکیو حکام نے اب تک 223 افراد اور 162 مویشیوں کو محفوظ مقامات پر منتقل کر دیا ہے، جناح بیراج پر پانی کی آمد 2 لاکھ 96 ہزار 629 کیوسک اور اخراج 2 لاکھ 89 ہزار 79 کیوسک ریکارڈ کیا گیا۔
کراچی پر بادلوں کا بسیرا، ہلکی بارش کا امکان
شہر قائد میں موسم ابر آلود ہے اور آج ہلکی بارش کا امکان ہے، محکمہ موسمیات کے مطابق شہر کا موجودہ درجہ حرارت 31 ڈگری اور ہوا میں نمی کا تناسب 72 فیصد ریکارڈ کیا گیا ہے، زیادہ سے زیادہ درجہ حرارت35 ڈگری سینٹی گریڈ تک جانے کا امکان ہے جبکہ جنوب مغرب سے 11 کلومیٹر فی گھنٹہ کی رفتار سے سمندری ہوائیں چل رہی ہیں۔
خیبر پختونخواکے پہاڑی علاقوں میں بارش، مالم جبہ میں کم ترین درجہ حرارت
محکمہ موسمیات خیبر پختونخوا کے مطابق چترال، دیر، سوات، بونیر، مالاکنڈ، ایبٹ آباد، بٹگرام، شانگلہ، ہری پور، کوہستان، تورغر اور مانسہرہ میں بارش کا امکان ہے۔
گزشتہ روز کاکول میں 14 ملی میٹر اور بالاکوٹ میں 3 ملی میٹر بارش ریکارڈ کی گئی، مالم جبہ میں سب سے کم درجہ حرارت 13 ڈگری جبکہ کالام میں 17 ڈگری سینٹی گریڈ ریکارڈ کیا گیا۔
بلوچستان کے بارکھان و موسیٰ خیل میں بارش کا امکان
بلوچستان کے بیشتر اضلاع میں موسم گرم اور مرطوب ہے، بارکھان، سبی، موسیٰ خیل، ژوب، لورالائی، ڈیرہ بگٹی، آواران اور دیگر علاقوں میں موسلا دھار بارش کا امکان ظاہر کیا گیا ہے۔
سبی اور تربت میں زیادہ سے زیادہ درجہ حرارت 41 ڈگری، نوکنڈی میں 46 ڈگری، چمن میں 36 ڈگری، گوادر و جیوانی میں 33 ڈگری ریکارڈ کیا گیا۔
پنجاب میں اب تک 123 ہلاکتیں، 462 زخمی، 150 عمارتیں متاثر
ڈی جی پی ڈی ایم اے کے مطابق رواں مون سون سیزن کے دوران پنجاب میں مختلف حادثات میں 123 افراد جاں بحق، 462 زخمی ہوئے اور 150 عمارتوں کو نقصان پہنچا، اموات کی وجوہات میں آسمانی بجلی گرنا، کرنٹ لگنا، نہاتے ہوئے ڈوبنا اور مخدوش مکانات گرنا شامل ہیں۔
پی ڈی ایم اے اور متعلقہ اداروں نے عوام سے اپیل کی ہے کہ بارشوں کے دوران دریاؤں، ندی نالوں اور خطرناک مقامات کے قریب نہ جائیں، اور کسی بھی ایمرجنسی کی صورت میں ریسکیو 1122 سے فوری رابطہ کریں۔
