اسلام آباد: (دنیا نیوز) پاکستان میں برطانوی ہائی کمشنر جین میریٹ نے کہا ہے کہ پاکستانی ایئرلائن کا برطانوی فضاؤں میں واپس آنا تاریخی لمحہ ہے۔
سماجی رابطے کی سائٹ ایکس پر اپنے پیغام میں پاکستان میں برطانیہ کی ہائی کمشنر جین میریٹ کا کا کہنا تھا کہ مبارک! پی آئی اے 25 اکتوبر کو اسلام آباد سے مانچسٹر کے لیے اپنی پہلی پرواز کے لیے تیار ہے، جو برطانیہ کی آسمانوں پر واپس آنے والی پہلی پاکستانی کیریئر ہے۔
برطانوی ہائی کمشنر جین میریٹ نے پی آئی اے کی واپسی کو خوش آئند قرار دیا اور کہا کہ پی آئی اے کی پرواز دونوں ملکوں کے عوام کو مزید قریب لائے گی، اسلام آباد سے مانچسٹر، پی آئی اے کی نئی اُڑان پاکستان برطانیہ تعلقات میں نیا باب رقم کرے گی۔
جین میریٹ کا کہنا تھا کہ سفری رابطوں کی بحالی تجارت اور سیاحت کے لیے مثبت قدم ہے، پی آئی اے کی واپسی سے برطانیہ میں پاکستانی کمیونٹی کو سہولت میسر آئے گی۔
برطانوی حکام نے پی آئی اے انتظامیہ کے اقدام کو سراہا اور کہا کہ پاکستانی پرچم بردار ایئرلائن دوبارہ برطانوی آسمانوں پر اُڑے گی۔
