پشاور: (ذیشان کاکاخیل) پی ٹی آئی قیادت نے رات گئے اہم اجلاس میں وزارت اعلیٰ کے لیے سہیل آفریدی پر اعتماد کا اظہار کرتے ہوئے پختونخوا اسمبلی کا اجلاس آج طلب کر لیا۔
ذرائع کے مطابق پاکستان تحریک انصاف کی قیادت اور ارکان اسمبلی کا رات گئے سپیکر ہاؤس میں غیر معمولی اجلاس منعقد ہوا جس میں پی ٹی آئی کے جنرل سیکرٹری سلمان اکرم راجا، سابق سپیکر قومی اسمبلی اسد قیصر، سپیکر صوبائی اسمبلی بابر سلیم سواتی، صوبائی صدر جنید اکبر سمیت بڑی تعداد میں ارکان اسمبلی شریک ہوئے۔
اجلاس میں وزیراعلیٰ خیبر پختونخوا کے لیے نامزد امیدوار سہیل آفریدی نے بھی شرکت کی، پی ٹی آئی قیادت اور ارکان اسمبلی نے متفقہ طور پر سہیل آفریدی پر اعتماد کا اظہار کرتے ہوئے انہیں باضابطہ طور پر وزیرِاعلیٰ کا امیدوار نامزد کر دیا۔
ذرائع کا کہنا ہے کہ اجلاس میں وزیراعلیٰ کے انتخاب کے آئینی و پارلیمانی طریقۂ کار پر عملدرآمد کا فیصلہ بھی کیا گیا۔
ذرائع نے مزید بتایا کہ علی امین گنڈا پور کے استعفے میں آئینی پیچیدگی کے باعث ایک نیا ہاتھ سے تحریر کردہ استعفیٰ تیار کیا گیا ہے جو گورنر کو بھجوایا جائے گا، پارٹی کے اندرونی ذرائع کے مطابق نئے استعفے کے بعد عدم اعتماد کی تحریک لانے کی ضرورت نہیں رہے گی۔
تحریک انصاف کے صوبائی صدر جنید اکبر نے اجلاس کے بعد کہا ہے کہ ہمارے پاس اس وقت 92 ووٹ موجود ہیں اور 100 ووٹ حاصل کرنے کا ہدف رکھا گیا ہے، وزیراعلیٰ کے انتخاب کے لیے دیگر جماعتوں سے بھی رابطے جاری ہیں۔
ذرائع کے مطابق آج سہ پہر 3 بجے خیبر پختونخوا اسمبلی کا اجلاس طلب کیا گیا ہے جس میں پی ٹی آئی پر لگائے گئے حالیہ الزامات کا باضابطہ جواب بھی دیا جائے گا، اس پیش رفت کے بعد صوبے کی سیاسی فضا میں گرما گرمی بڑھ گئی ہے اور آئندہ 24 گھنٹے فیصلہ کن ثابت ہو سکتے ہیں۔
