اسلام آباد: (دنیا نیوز) صدر اور وزیراعظم نے دہشت گردوں کیخلاف کارروائی پر سکیورٹی فورسز کی پذیرائی کی۔
صدرِ مملکت آصف علی زرداری نے دہشت گردی کے خلاف آپریشن میں شہید ہونے والے کیپٹن نعمان سلیم اور اُن کے پانچ ساتھیوں کی قربانی کو خراجِ تحسین پیش کیا، صدر آصف علی زرداری نے کہا کہ قوم اپنے بہادر سپوتوں کی قربانیوں پر فخر کرتی ہے، صدرِ مملکت نے دہشت گردوں کے خاتمے کے لیے سکیورٹی فورسز کے عزم، بہادری اور پیشہ ورانہ صلاحیتوں کو سراہا۔
صدرِ مملکت نے کہا کہ وژن عزمِ استحکام کے تحت بھارت کے حمایت یافتہ فتنۂ خوارج کے خلاف آپریشن دہشت گردی کے مکمل خاتمے تک جاری رہے گا، شہدا کی قربانیاں قومی اتحاد، سلامتی اور استحکام کی ضمانت ہیں۔
صدرِ مملکت نے شہداء کے اہلِ خانہ سے دلی ہمدردی کا اظہار کیا اور اُن کے لیے صبر و حوصلے کی دعا کی۔
وزیراعظم محمد شہبازشریف نے آپریشن کے دوران دہشت گردوں کا بہادری سے مقابلہ کرتے ہوئے جام شہادت نوش کرنے والے پاک فوج کے کیپٹن ڈاکٹر نعمان سیلم، حوالدار امجد علی، نائیک وقاص احمد، سپاہی اعجاز علی، سپاہی محمد ولید اور سپاہی محمد شہباز کو خراج عقیدت پیش کیا۔
وزیراعظم نے شہدا کی بلندی درجات کی دعا کی اور ان کے اہل خانہ سے اظہار تعزیت کرتے ہوئے کہا کہ پوری قوم سکیورٹی فورسز اور شہدا کو سلام پیش کرتی ہے، ملک سے دہشت گردی کے مکمل خاتمے کے لئے پر عزم ہیں۔
