اسلام آباد:(دنیا نیوز) سینیٹ کے آج ہونے والے اجلاس کا 18نکاتی ایجنڈا جاری کردیا گیا۔
سینیٹ سیکرٹریٹ سے جاری ایجنڈے کے مطابق اجلاس کا آغاز تلاوت کلام پاک سے کیا جائے گا، سینیٹ اجلاس میں سوالات و جوابات کا سیشن ہوگا، شیری رحمٰن ماحولیاتی تبدیلی کمیٹی کی رپورٹ پیش کریں گی۔
ایجنڈے میں کہا گیا کہ اجلاس میں پاکستان وائلڈ فونا اینڈ فلورا ایکٹ میں ترمیمی بل 2024 پر رپورٹ پیش ہو گی، شیری رحمٰن کمیٹی کی سالانہ رپورٹ 2024 تا اور سینیٹر عرفان صدیقی خارجہ امور کمیٹی کی رپورٹس پیش کی جائیں گی۔
اِسی طرح سربیا میں پاکستانیوں کو فراہم کردہ ویزا معاونت پر رپورٹ، سینیٹر عون عباس یوٹیلٹی سٹورز کارپوریشن کی بندش سے متعلق رپورٹ پیش کریں گے، سینیٹر رانا محمود الحسن نیشنل سکول آف پبلک پالیسی ترمیمی بل بھی ایجنڈے کا حصہ ہے۔
اجلاس میں وزیر قانون اعظم نذیر تارڑ قانونِ شہادت ترمیمی بل 2025 پیش کریں گے، وزیر خزانہ محمد اورنگزیب ورچوئل ایسٹس آرڈیننس 2025 میں توسیع کی قرارداد اور وزیرِ داخلہ محسن نقوی فرنٹیئر کانسٹیبلری تنظیمِ نو آرڈیننس 2025 سینیٹ میں پیش کریں گے۔
وزیرِ تعلیم خالد مقبول صدیقی کنگ حمد یونیورسٹی بل 2025 منظوری کے لیے پیش کریں گے، دانش سکولز اتھارٹی بل 2025 پر غور اور منظوری دی جائے گی، وزیرِ سرمایہ کاری قیصر احمد شیخ آسان کاروبار بل 2025 پیش کریں گے۔
