لاہور:(دنیا نیوز)امیر جماعت اسلامی حافظ نعیم الرحمان نے کہا ہے کہ سود کے نظام میں معاشی ترقی ممکن نہیں۔
صوبائی دارالحکومت میں پریس کانفرنس کرتے ہوئے حافظ نعیم الرحمان کا کہنا تھا کہ ہم پر عزم ہیں کہ ہم پاکستان میں ہونے والا دنیا کی تاریخ کا بہت بڑا اجتماع ہوگا۔
اُنہوں نے کہا کہ مینار پاکستان تین سو انتیس ایکٹر پر مشتمل علاقہ ہے، دنیا میں خواتین کا بھی بڑا اجتماع ثابت ہوگا، وکلاء طلبہ خواتین نوجوانوں کی بڑی تعداد مینار پاکستان پر ہوگی، جمہوریت دیکھنی ہے تو جماعت اسلامی کو دیکھیں۔
امیر جماعت اسلامی کا کہنا تھا کہ جماعت اسلامی کے اجتماع عام میں ’میرا پاکستان‘ کا بڑا ڈسپلے ہوگا،مینار پاکستان اجتماع عام میں قرارداد معیشت پاس کریں گے، ہمارا سلوگن ’بدل دو نظام‘ محض نعرہ نہیں ہے۔
حافظ نعیم الرحمان نے کہا کہ پاکستان جو اب تک 78سال کا ہو چکا ہے ستر فیصد تو نوجوان ہیں اس ملک میں سسٹم ہی موجود نہیں، عدالتی نظام کسی جج یا وکیل سے پوچھ لیں، پاکستان کا موجودہ عدالتی نظام گل سڑ چکا ہے۔
اُن کا کہنا تھا کہ عدالت کا پورا نظام تبدیل کرنا پڑے گا، پیوند کاری سے عدالتی نظام تبدیل نہیں ہوگا، شاخوں کو کاٹنے یا جھاڑنے سے نہیں ہوگا بلکہ نیا نظام لانا ہوگا جس میں نظام پر کوئی طبقہ مالک نہیں بنے گا۔
امیر جماعت اسلامی نے کہا کہ پاکستان میں تعلیمی نظام میں جتنی دولت ہے وہ اتنی اچھی تعلیم خریدتا ہے، جس قوم میں تعلیم دولت کی بنیاد پر ہو تو کیا قوم بنے گی، بہترین نصاب بنانا ہوگا۔
حافظ نعیم الرحمان نے کہا کہ جب تک سود کا نظام رہے گا تو معاشی نظام نہیں پنپنے گا، معیشت کی قرارداد دین و آئین کے مطابق لائیں گے، استحصالی نظام ختم کرنا ہوگا، مزدوروں کو لیبر لاز کے ذریعے حقوق حاصل نہیں ہیں۔
