اسلام آباد:(دنیا نیوز) پاکستان پیپلز پارٹی کی سیکرٹری اطلاعات شازیہ مری نے کہا ہے کہ ، 18 ویں ترمیم کو رول بیک نہیں ہونے دیں گے۔
وفاقی دارالحکومت سے جاری اپنے ایک بیان میں شازیہ مری کا کہنا تھا کہ پیپلزپارٹی صوبوں کو مضبوط دیکھنا چاہتی ہے، ایسے کسی پروپوزل کی حمایت نہیں کر سکتے جس سے صوبوں کے اختیارات واپس لیے جائیں۔
اُنہوں نے کہا کہ پیپلزپارٹی صوبوں کو دیے گئے اختیارات کبھی واپس نہیں لے سکتی، اگر آئینی ترمیم میں ایسی کوئی چیز ہےجس سے نظام میں بہتری آسکتی ہے تو سپورٹ کریں گے۔
سیکرٹری اطلاعات پیپلزپارٹی کا کہنا تھا کہ ہم ایسے کسی پروپوزل کی حمایت نہیں کرسکتے جس سے صوبوں کے اختیارات واپس لیے جائیں۔
شازیہ مری نے کہا کہ اٹھارویں ترمیم اور این ایف سی حصے پر ہمارا مؤقف واضح ہے ہم اس سے پیچھے نہیں ہٹیں گے، 18 ویں ترمیم کا رول بیک تو ممکن ہی نہیں۔
اُن کا مزید کہنا تھا کہ اگر پیپلزپارٹی کی سپورٹ چاہتے ہیں تو اس طرح کی کسی بات میں پیپلزپارٹی شراکت داری نہیں کرسکتی۔
