اسلام آباد: (دنیا نیوز) تحریک انصاف نے سینیٹر سیف اللہ کو پارٹی سے نکال دیا۔
فردوس شمیم نے بتایا کہ پی ٹی آئی نے سینیٹر سیف اللہ کی رکنیت فوری طور پر ختم کر دی، پارٹی نظم و ضبط کی خلاف ورزی پر کارروائی کی گئی، الیکشن کمیشن کو سینیٹر سیف اللہ کی نشست خالی کرنے کی اطلاع دی جائے گی۔
پارٹی کی طرف سے جاری کئے گئے نوٹیفکیشن کے مطابق سینیٹر سیف اللہ کو 72 گھنٹے میں اپیل کا موقع دیا گیا، فیصلہ پارٹی نظم و ضبط اور جمہوریت کے تحفظ کے لیے کیا گیا۔
واضح رہے سینیٹ اجلاس کے دوران اظہار خیال کرتے ہوئے پی ٹی آئی سینیٹر سیف اللہ ابڑو کا کہنا تھا کہ بھارت کو پاک فوج نے شکست دی، فیلڈ مارشل عاصم منیر کو دنیا نے عزت دی ہے، پاک فوج اور فیلڈ مارشل عاصم منیر کی وجہ سے ووٹ دیا ہے۔
سینیٹر سیف اللہ ابڑو نے 27 ویں ترمیم کیلئے ووٹ کاسٹ کیا تھا، انہوں نے کہا کہ میں آج یہاں سے اپنی نشست سے استعفیٰ دیتا ہوں، مجھے آپ ڈی نوٹی فائی کر دیں۔
سینیٹر سیف اللہ ابڑو نے پارٹی پالیسی کی مخالفت کرتے ہوئے آئینی ترمیم کے حق میں ووٹ دیا تھا، سیف اللہ ابڑو2021ء میں پی ٹی آئی ٹکٹ پر سندھ سے منتخب ہوئے تھے، سیف اللہ ابڑو کی مدت مارچ 2027ء تک تھی۔
