وفاقی آئینی عدالت کی پہلی کاز لسٹ، 3 بنچ آئندہ ہفتے سماعت کرینگے

اسلام آباد: (دنیا نیوز) وفاقی آئینی عدالت کی پہلی کاز لسٹ جاری کر دی گئی ہے۔

جاری کردہ کازلسٹ کے مطابق آئندہ ہفتے وفاقی آئینی عدالت میں تین بنچز مقدمات کی سماعت کریں گے۔

کاز لسٹ کے مطابق چیف جسٹس وفاقی آئینی عدالت جسٹس امین الدین خان کورٹ روم نمبر ایک میں مقدمات کی سماعت کریں گے، جبکہ جسٹس حسن اظہر رضوی کو کورٹ روم نمبر دو میں سماعت کی ذمہ داری دی گئی ہے۔

تیسرے بنچ میں جسٹس عامر فاروق اور جسٹس کے کے آغا شامل ہیں، جو دو رکنی بنچ کی حیثیت سے کورٹ روم نمبر تین میں مقدمات سنیں گے۔

وفاقی آئینی عدالت کے قیام کے بعد یہ پہلی کاز لسٹ ہے، جس کے تحت اہم آئینی مقدمات کی کارروائی آئندہ ہفتے شروع ہوگی۔

واضح رہے کہ وفاقی آئینی عدالت کے چیف جسٹس امین الدین خان نے 14 نومبر کو اپنا پہلا بڑا فیصلہ کرتے ہوئے وفاقی آئینی عدالت کا رجسٹرار تعینات کیا تھا، سابق ڈسٹرکٹ اینڈ سیشن جج محمد حفیظ کو رجسٹرار آئینی عدالت جبکہ مظہر بھٹی کو سیکرٹری ٹو چیف جسٹس وفاقی آئینی عدالت تعینات کیا گیا۔