اسلام آباد: (ویب ڈیسک) صدر مملکت آصف علی زرداری اور وزیراعظم محمد شہبازشریف نے باجوڑ اور بنوں میں کامیاب کارروائیوں پر سکیورٹی فورسز کو خراج تحسین پیش کیا۔
صدر مملکت آصف علی زرداری نے بھارتی پشت پناہی میں سرگرم فتنہ الخوارج کے 23 دہشت گردوں کے خاتمے کو سکیورٹی فورسز کی مؤثر حکمت عملی قرار دیا، صدر مملکت نے کہا کہ باجوڑ میں خوارج سرغنہ سمیت متعدد دہشت گردوں کا مارا جانا امن دشمن عناصر کیلئے واضح پیغام ہے۔
بنوں میں ایک اور کارروائی میں بارہ خوارج کے انجام کو پہنچنے پر صدر مملکت آصف علی زرداری نے جوانوں کی پیشہ ورانہ مہارت کی تعریف کی، صدر مملکت نے کہا کہ سکیورٹی فورسز کی بروقت کارروائیاں ملک میں امن کے قیام کیلئے ریاست کے عزم کی عکاس ہیں، انہوں نے کہا کہ پاکستان کی سرزمین پر غیر ملکی پشت پناہی میں سرگرم دہشت گردی کی کوئی گنجائش نہیں۔
وزیراعظم محمد شہباز شریف نے ضلع باجوڑ اور ضلع بنوں میں فتنتہ الخوارج کے دہشت گردوں کے خلاف دو مختلف کامیاب کارروائیوں پر سکیورٹی فورسز کو خراج تحسین پیش کرتے ہوئے کہا کہ ملک سے ہر قسم کی دہشت گردی کے مکمل خاتمے کے لئے پر عزم ہیں۔
وزیراعظم نے ان آپریشنز میں فتنہ الخوارج کے 23 دہشت گردوں کو ہلاک کرنے پر سکیورٹی فورسز کی تعریف کی اور کہا کہ عزم استحکام کے وژن کے تحت سکیورٹی فورسز دہشت گردی کے خلاف بڑی کامیابیاں حاصل کر رہی ہیں۔
محمد شہبازشریف نے مزید کہا کہ پوری قوم دہشت گردی کے خلاف اس جنگ میں افواج کے ساتھ کھڑی ہے۔
