راولپنڈی: (دنیا نیوز) پاک فوج کے شعبہ تعلقات عامہ کے مطابق سکیورٹی فورسز نے خیبرپختونخوا میں مختلف کارروائیوں کے دوران بھارتی پراکسی فتنہ الخوارج کے 4 دہشت گرد ہلاک کر دیئے۔
آئی ایس پی آر کے مطابق یہ کارروائیاں 17 اور 18 نومبر کو کی گئیں، باجوڑ میں خوارج کی موجودگی کی اطلاع پر انٹیلی جنس بیسڈ آپریشن کیا گیا، شدید فائرنگ کے تبادلے میں ایک خارجی جہنم واصل ہو گیا۔
پاک فوج کے شعبہ تعلقات عامہ کے مطابق شمالی وزیرستان کے علاقوں سپین وام اور ذاکر خیل میں بھی کارروائی کے دوران 2 خوارج کو ہلاک کر دیا گیا۔
آئی ایس پی آر کے مطابق ڈیرہ اسماعیل خان میں ایک اور کارروائی میں ایک خارجی مارا گیا، مارے گئے خوارج سے اسلحہ اور گولہ بارود برآمد ہوا، ہلاک خوارج دہشت گردی کی متعدد وارداتوں میں ملوث تھے۔
علاقے میں دیگر خارجیوں کے خاتمے کیلئے سینی ٹائزیشن آپریشنز جاری ہیں، سکیورٹی فورسز اور قانون نافذ کرنے والے اداروں کی طرف سے وژن عزم استحکام کے تحت آپریشنز کئے جا رہے ہیں۔
پاک فوج کے شعبہ تعلقات عامہ کے مطابق دہشت گردوں کا ملک سے صفایا کرنے کے لیے پوری رفتار سے آپریشن جاری رہے گا۔
شہباز شریف کا سکیورٹی فورسز کو خراج تحسین
وزیراعظم محمد شہباز شریف نے ضلع باجوڑ، ضلع شمالی وزیرستان اور ضلع ڈیرہ اسماعیل خان میں فتنہ الخوارج کے دہشت گردوں کے خلاف مختلف کامیاب کارروائیوں پر سکیورٹی فورسز کو خراج تحسین پیش کیا۔
شہباز شریف نے ان آپریشنز میں فتنہ الخوارج کے 4 دہشت گردوں کو ہلاک کرنے پر سکیورٹی فورسز کی پذیرائی کی اور کہا کہ عزم استحکام کے ویژن کے تحت سکیورٹی فورسز دہشت گردی کے خلاف بڑی کامیابیاں حاصل کر رہی ہیں۔
وزیراعظم کا کہنا تھا کہ پوری قوم دہشت گردی کے خلاف اس جنگ میں پاکستان کی افواج کے ساتھ کھڑی ہے، ملک سے ہر قسم کی دہشت گردی کے مکمل خاتمے کے لئے پُرعزم ہیں۔
