اسلام آباد: (دنیا نیوز) جسٹس ریٹائرڈ یار محمد نگران وزیراعلیٰ گلگت بلتستان مقرر کر دیئے گئے، وزیراعظم شہباز شریف نے مشاورت کے بعد تقرری کی منظوری دے دی۔
گلگت بلتستان چیف کورٹ کے سابق جج جسٹس (ریٹائرڈ) یار محمد خان کو گلگت بلتستان کا کیئرٹیکر وزیراعلیٰ مقرر کیا گیا، وہ ضلع استور کے گاﺅں ناصرآباد سے تعلق رکھتے ہیں اور قانون و عدلیہ کے شعبے میں دہائیوں کا تجربہ رکھتے ہیں۔
جسٹس (ر) یار محمد نے کراچی سے ایل ایل بی کی ڈگری حاصل کرنے کے بعد گلگت بلتستان میں تقریباً 15 سال تک وکالت کی، انہوں نے فیڈرل پبلک سروس کمیشن (FPSC) کے ذریعے سول جج کا امتحان پاس کیا، جس کے بعد وہ مختلف عدالتی مناصب پر فائز رہے۔
وہ ڈسٹرکٹ اینڈ سیشن جج، چیف کورٹ کے رجسٹرار اور بعد ازاں گلگت بلتستان چیف کورٹ کے جج تعینات ہوئے، جج کے طور پر اپنے دور میں انہوں نے آئینی، سول اور انتخابی نوعیت کے اہم مقدمات کی سماعت کی، وہ الیکشن ٹریبونل کے رکن کی حیثیت سے انتخابی تنازعات اور نامزدگیوں سے متعلق اپیلوں کی جانچ پڑتال میں بھی شامل رہے۔
بطور جج انکا کردار غیر متنازعہ اور پروفیشنل رہا ہے، ریٹائرمنٹ کے بعد انہوں نے قانونی شعبے میں اپنی خدمات جاری رکھیں، اس وقت ’’دی لیگل اکیومن‘‘کے ساتھ بطور مینٹر منسلک ہیں، جہاں وہ نوجوان وکلاء کی رہنمائی کے ساتھ آئینی، سول اور اپیل کے معاملات پر مشاورت فراہم کرتے ہیں۔
نامزدگی کے بعد جسٹس (ر) یار محمد سے توقع کی جا رہی ہے کہ وہ اپنے وسیع عدالتی تجربے کی بنیاد پر گلگت بلتستان میں شفاف انتخابی عمل اور انتظامی تسلسل کو یقینی بنانے میں کلیدی کردار ادا کریں گے۔
